Rayat rugi enti milih penyakal – Harden

SIMANGGANG: Pemansang enda datai kediri enti ukai ari pengeransing pengari rayat, pia ku Menteri Muda Pengintu Pengelantang Komuniti Datuk Francis Harden Hollis.

Nya alai Harden ngelalau rayat ba sitak Batu Lintang, Undop lebih agi ari rumah panjai anang alah ajum penyakal.

“Enti sema sitak Simanggang dipegai penyakal, konstitusyen nya deka rugi laban nadai nerima agih belanja ari perintah.

“Ambika banding, agih belanja RM5 juta ungkup Program Transfomasyen Menua Pesisir (RTP), RM2 juta ungkup Projek Mit Pemansang Menua Pesisir (MRP) enggau RM1 juta ungkup Bantu Nyeleti Rumah.

“Rayat deka rugi lalu pengari rayat ari penyakal deka lantang ati enggau gaji nyadi siku pengari rayat,” ku iya nyemetak madah.

Harden mansutka jaku nya rambau Program Info On Wheel (IOW) diatur ba Rumah Suntai Awel, Empadi Tengah, Batu Lintang, Undop ditu kemari.

Suara Sarawak