KUCHING: Rayat di mengeri Kuching diperansang ngaul diri dalam semua servis ti disediaka sektor perintah tauka peribit laban chara tu diatu chukup muntang asil ari pemisi teknologi.
Kepala Menteri Datuk Patinggi Abang Johari Tun Openg madahka reti pintar ukai semina bepanggai ngagai teknologi tang ngaul semua pekara baka pelasar perintah, kaul rama, gaya menua, komunikasyen enggau penyedar adat asal.
“Ba baruh Strategi Ekonomi Digital Sarawak 2018 – 2022 bisi 47 strategi enggau chara strategik sereta tujuh sektor besai iya nya sektor Betanam Betupi, Industri Betukang 4.0, Dagang Temuai, Mengeri Pintar, Pengerai Digital, e-Dagang enggau Perintah Digital.
“Nengah strategi tu, kitai deka ngemansutka siti pelasar dikena orang Sarawak megai tanggung pengawa diri nyukung program transformasyen nengeri tu,” ku iya.
Abang Johari bejaku munyi nya rambau Bejadika Ngintu Hari Mengeri Besai Kuching ti ke-33 ditu, kemari.
Ku iya, dalam inisiatif nyadi Mengeri Pintar Sarawak, perintah deka meri servis bekuliti enggau efisyen ngagai rayat.
“Kitai mega deka meri pengidup ti selamat enggau meri pengidup ti nyamai ngagai rayat.
“Kelimpah ari nya, kitai ngarapka siti mengeri ti beresi enggau servis perengkapengangkut mungkur semua ulih disediaka.
“Berebak enggau nya, kitai mega deka mansang manah agi ari sukut logistik ungkup aktiviti ekonomi digital,” ku iya.
Nya alai, iya madahka diri nyukung rambai jaku Hari Bandaraya Kuching ke sekali tu iya nya ‘Transformasi Digital ke Arah Membentuk Bandaraya Kuching Pintar’.
“Dalam pekara tu DBKU enggau MBKS mesti begulai sejalai lengkas awakka kitai ulih ngerandang status mengeri pintar manggai taun 2022.
“Agi mayuh pekara deka digaga enggau dipejalaika ungkup nyapai tuju nya, tang aku pechaya nengah pemansang teknologi digital ti majak manah kitai ulih nyapai nya ila,” ku iya.
Sama bisi datai Menteri Kandang Menua enggau Pengawa Berumah Datuk Sri Dr Sim Kui Hian, Menteri Muda ba Opis Kepala Menteri (Pekara Islam enggau DBKU ) Datuk Dr Abdul Rahman Junaidi, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali, Datuk Bandar Kuching Utara Datuk Haji Junaidi Haji Reduan, Datuk Bandar Kuching Selatan Datuk Wee Hong Seng enggau ke bukai.
