Rayat Sarawak enggai dipegai parti bula

KUCHING: Kaban Parlimen Santubong, Datuk Seri Wan Junaidi Tuanku Jaafar bisi pengandal ngagai rayat Sarawak enda mudah ngasuh Bumi Kenyalang dipegai Pakatan Harapan (PH) maya Pengawa Bepilih Nengeri Ke-12 (PRN12) ke deka datai.

Ku iya, PH deka ngena strategi ti sama iya nya ngena jaku bula enggau petenah baka dikena lebuh PRN11 tu tadi.

“Sida mega deka ngambi asil ari Sarawak baka minyak enggau gis, kampung enggau pengeraja asal sereta tanah enggau asil ba kandang tasik.

“Orang Sarawak deka lenyau semua asil nya enti enda ngetanka pekara nya,” ku iya lebuh dirandau pemberita, ditu kemari.

Lebuh meda pekara ti nyadi ba menua diatu, Wan Junaidi madahka ekonomi nurun, utang majak nambah, rega nukar ringgit ngagai dolar Amerika Syarikat (AS) majak nurun, rega barang majak niki, rega minyak enda nurun nyengkaum pinjau Perbadanan Tabung Pendidikan Tinggi Nasional (PTPTN) agi dibayar.

“PH semina landik bejaku enggau besemaya tang enda pintar megai menua. Anang semina datai enggau ngeruga Sarawak laban rayat ditu enggaika sida nya.

“Kami dalam Gempung Parti Sarawak (GPS) enggau semua rayat Sarawak deka ngetanka hak menua Sarawak,” ku Junaidi nyemetak.

Iya mega ngarapka rayat Sarawak enda alah ajum enggau jaku semaya ti dipadahka PH.

Ku Junaidi, jaku bula PH terang bendar nengah video ti madahka jaku bula sida baka 20 peratus asil Petronas, 50 peratus chukai digumpul ari Sarawak, minyak RM1.50 seliter, rega barang nurun enggau ke bukai.

Suara Sarawak