KUCHING: Perintah Sarawak deka meri vaksin ngagai semua orang ke diau ba menua tu taja nadai tingki.

Kepala Menteri Datuk Patinggi Abang Johari Tun Openg madah, enti sema peranak nya nadai tingki, tuai raban bansa ulih ngenukuka nya anembiak iya ngambi nerima vaksin.

“Tuai raban bansa ulih ngenuku laban sida ngelala anembiak iya lalu ulih mai rintai nama anembiak ngagai Palan Meri Vaksin (PPV) ngambi anembiak iya nerima vaksin,” terang iya.

Abang Johari mansutka jaku nya pengudah ngabas Palan Meri Vaksin (PPV) ba endur gawa iya nya di The Spring, Vivacity enggau Longi, ditu kemari.

Nambahka nya ku iya, pengawa betuchuk vaksin di Sarawak lanchar dipejalai ke alai 1.025 juta dos vaksin Covid-19 deka diberi ngagai penerima.

“Naka 24 June tu tadi, kitai udah meri 61,000 dos vaksin ba selampur menua.

“Kami mega keran deka meri vaksin ngagai menua ulu nengah raban mindah kin kitu nyentuk ngagai Mulu enggau Ba’Kelalan,” terang Abang Johari.

Ku iya, ambika chunto, pengawa mri vaksin di Kapit lanchar dipejalai ngena chara betuchuk dulu, rejister dudi.
Nangkan nya, Sapit Kepala Menteri ke mega Chairman Komiti Penyangga Penusah Nengeri (JPBN), Datuk Amar Douglas Uggah madah, Perintah Sarawak minta 650,000 dos vaksin tunggal, Cansino ungkup peranak menua ulu.

“Menteri Sains, Teknologi enggau Inovasyen, Khairy Jamaluddin madahka bekal keterubah vaksin nya deka datai ba Malaysia ba bulan Julai tu.

“Kami minta 650,000 dos dianjung ngagai Sarawak,” ku Uggah nerang.

Dulu ari nya, Khairy madahka 3.5 juta vaksin Cansion deka datai ba Malaysia bulan Julai tu.