Rebak baru dikeandal nampung adat, main asal

ENGKILILI: Rebak baru diatu diperansang nyikap diri belajar enggau nampung main asal bansa diri ngambika semampai bisi dipeda dataika jemah.

Prinsipal Sekula Sekondari (SMK) Engkilili Dickson Palot Malintan madah, main asal nya enda tau enda ditan sida taja agi belajar di sekula.

“Semua nembiak anang enda ingatka adat enggau main asal bansa diri empu kelebih agi bansa Iban.

“Ukai semina nya, kita mega anang enda nyikap diri belajar lalu nampung pengelebih dikembuan bansa kita,” ku iya lebuh bejaku ba Pengerami Malam Main Asal SMKE 2019, apin lama ke udah.

Kelimpah ari nya, Dickson mega ngelalau bala nembiak sekula nya semampai nyulut ba akademik.

Ku iya, tu deka nentuka kuing pengidup enggau pengelantang sida dudi hari.

Beserimbai enggau pengerami nya, pekit tanda asal, Pekit Kumang, karaoke kediri enggau karaoke bepadu nyawa mega bisi diatur.

Ba Pekit Kumang gelar champian dipenggi Sharollina Robin lalu Lovina Sima James lumur dua enggau Siti Nandong ketiga.

Gelar champian Pekit Karaoke Kediri diempu Jacklyna Ten seraya lumur dua enggau tiga pulai ngagai Elauthurine enggau Mohd Arif Haikal.

Kategori Bepadu Nyawa meda pemujur Lydiana enggau Zodik menggi gelar champian ditangkan Natasha enggau Camila ba penuduk lumur dua sereta Jacky enggau Edward lumur tiga.

Sama datai Penyanding Penemu Kaunsil Pengawas/Ketuai Warden Kullin Djayang, Penulung Kanan Kokurikulum Jensen Hilary Dundang enggau Penulung Ketuai Warden Platicia Bagat.

KUMANG SMKE… Bala pemenang Pekit Kumang SMKE 2019 begambar kenang pengudah nerima perais. Bela dipeda Dickson (lima kanan), Jensen (enam kanan) enggau Kullin (kanan).