SARATOK: Tan enggau intu meruan adat asal enggau gaya idup asal kitai bansa Dayak kelebih agi bansa Iban, ku Kaban Parlimen Saratok Ali Biju nangkan.
Ku iya, rebak baru patut diajar pasal adat enggau gaya idup bansa kitai laban sida tu deka nail semua tu dudi hari.
“Bansa Dayak kelebih agi bansa Iban patut berunding sereta ngiga chara pemadu manah dikena ngintu enggau nyaga adat enggau gaya idup ditampung ari aki ini kitai menya.
“Kelimpah ari nya, kitai mega enda tau enda ngajar sida ke nembiak nengah pengawa ngatur pengerami baka Gawai Dayak ba rumah panjai sida empu.
“Enti rebak nembiak dikaul ngatur pengawa, sida deka belajar enggau meretika atur tauka idar pengawa sereta adat ti betul nentuka adat tu enda lenyau,” ku Ali madah nyemetak.
Iya mansutka jaku tu lebuh bejadika Pengerami Mantar Gawai Dayak di Rumah Anchang Sungai Muding Saratok apin lama ke udah.
Pia mega ku Ali, kitai bansa agi begunaka sanding penemu sida ke tuai ti nyadi malin rebak biak nentuka penulin adat meruan dijaga sereta enda dibalut gaya idup moden kemaya hari.
“Kitai bansa chukup kaya enggau adat basa ti nyadika lalau pengidup kitai begulai enggau pangan diri.
“Nya kebuah aku tatuk amat nyebut pemesai guna kitai ngetanka adat enggau gaya idup ngagai bala kita laban ati chukup angkunka ulah sida ke tuai ti chukup siruka adat enggau gaya idup lalu tu nyadi kelai bansa kitai,” tandu iya.
Pengerami Mantar Gawai Dayak enggau Pekit Kumang tu terubah diatur dalam taun 2014 di Rumah Bennet Buan Palai Ruai Ulu Awik ti ditibak ari penemu Ali empu.
Ku Ali, enti suba gelar pekit tu dikumbai Kumang Krian tang diatu udah ditukar ngagai Kumang P205 Saratok.
Indu Iban benama Jasmine Sinja Robinson ari Taman Lily Seratok dipadu menggi gelar Kumang Gawai Dayak Renggat Parlimen Saratok berebak enggau pengerami lemai nya.
Jasmine belajar ba Universiti Teknologi Mara (UiTM) beumur 25 taun ngalahka sepuluh iku pemekit kepenudi bukai lalu pulai ngemai perais mata duit RM2000, jumpang, selampai, trofi enggau hamper.
Penuduk lumur dua tauka gelar Lulong dipenggi Elizabeth Lydiana Bujang seraya Amrita Sundai Ambang menggi gelar Selinggar Matahari ba penuduk ketiga.
Seduai nerima perais mata duit RM1500 enggau RM1000 disempulang trofi enggau hamper.
Seraya Amrita mega nerima Anugerah Ngepan Asal Pemadu Manah ti disempulang perais mata duit RM500.
Berebak enggau nya, Ali mega bisi ngemendarka geran Projek Mit Pemansang Menua Pesisir (MRP) penyampau RM30,000 ngagai Rumah Anchang, Anchang Kana.
Pengerami sehari nya dipungkal enggau miring lalu diisi enggau bemacham main asal nyengkaum ngajat.
