Rebut peluang ngansah pengelandik ba Kuching Skills College

KUCHING: Nembiak lepas PT3 enggau SPM diperansang ngerebut peluang nyikap diri ngena pengelandik ti bisi disediaka Kuching Skills College (KSC) ditu.
Ketuai Pegawai Eksekutif KSC, Novert Sullang madahka kolej sida bisi nyendiaka Program Khas Diploma Pengelandik Malaysia Pasca Covid-19 ungkup raban nya.
Ku iya, bala nembiak ke bisi penekul ba pekara belanja dikena nampung pelajar patut badu irau ati laban bisi elaun disedia ungkup sida.
“Kolej kami ngelaluka bala nembiak ke nadai diterima masuk ba Palan Pelajar Tinggi Perintah (IPTA) ngambi bagi ba program khas tu.
“Kita anang nangi laban program khas Pelajar enggau Latih Teknikal enggau Vokasional (TVET) baka Diploma Pengelandik Malaysia tu endang diaku penuh Opis Pemansang Pengelandik.
“Opis Menteri Pengereja Pengawa mega udah ngaku diploma tu ke alai peluang kereja deka disediaka sida pengudah tembu kus ila,” ku iya lebuh dirandau Suara Sarawak.
Ku Novert, program khas TVET ke dipejalai sekumbang Atur Mindah Betagang (PKP) enggau pasca Covid-19 mega diberi elaun sara hidup RM4,800 setaun.
Penerang silik pasal program enggau chara rejister tau dipeda ba website rasmi kolej nya, www.kuchingskills.edu.my.
Bala kita mega tau betanyaka penerang silik ngagai kaunsilor pelajar ba http://wa.me/60168595540 tauka telefon ngagai Pegawai Rejister KSC, Audrie ba lumur 0126010366.