Rega getah RM3 sekilo

KUCHING: Perintah Sarawak semampai betatika nasip pekebun getah ke napi penusah sekumbang Atur Tagang Pejalai (PKP).

Sapit Kepala Menteri Datuk Amar Douglas Uggah Embas madah, perintah deka meli getah ari bala pekebun enggau rega 50 sen tinggi ari makit, iya nya manggai RM3 sekilo.

“Enti sema rega getah ba makit tinggi agi ari rega dipadahka tu, bala pekebun ulih sekalika nyual getah ngagai kami tauka jual ba makit,” terang Uggah.

Nambahka nya ku iya, tu inisiatif Perintah Sarawak mantu bala orang bumai, pekebun, orang berikan enggau peladang ti dituntung penusah sekumbang PKP tu.

Pekara tu nyata dipeda pengudah Perintah Sarawak ngagihka belanja RM2.3 juta dikena meli asil kebun ti enda alah jual sekumbang atur diterit.

Suara Sarawak