Rega Ilang manggai RM15,000 sebilah

ILANG tu endang beguna amat ngagai kitai bansa Iban kelimpah nyadi senyata pesaka sereta dikena ngelaika pemerani bala bujang berani Iban.

Ba tanda Ajat empu, senyata tu suah dikena sida ke lelaki lebuh ngajat lalu suah agi disangking ba pekayan asal bujang berani Iban dikumbai Terabai.

Johnny Barangan ngembuan penau enggau bepeneleba ngaga Ilang madahka senyata nya suah dikena bala aki ini kitai kelia bedengahka pala munsuh.

“Bujang berani Iban kelia endang tampak rita laban ngembuan semengat berani sida ngelaban munsuh. Nadai kala surut lebuh betempuh enggau munsuh.

“Nambahka nya, sida bujang berani diperansang nitihka adat ngayau pengudah ngelaban enggau bedengahka munsuh.

MAR REGA… Johnny mantaika Duku Ilang Gajah diambuh enggau ngembuan ukir ngujungka duku nya mar rega.

“Pengudah didengah, semina pala munsuh deka dibai pulai ke rumah panjai kelai pemujur ngelaban munsuh lalu tubuh munsuh ditinggal pia aja.

“Ari nya, nama Ilang tu digaga pengudah dikena mumpung pala munsuh kelai dengah bujang berani,” ku iya nerang silik.

Johnny berengkah ngaga senyata tu kenyau ari iya agi biak laban nampung penemu, peneleba sereta pengelandik ari apai iya empu.

Iya ukai semina orang ke landik ngambuh ilang aja tang mega ngaga macham bansa duku bukai nyadika tanda kenang lalu pengelandik Johhny tu udah diaku Kaunsil Krafjari Malaysia nyadi Adiguru Pandai Kerja Besi.

Ku Johnny, iya diaku pengudah menang ba mayuh pekit ngambuh duku renggat nengeri enggau nasional ba pengelandik ngambuh besi kelebih agi Ilang.

ALUS… Ukir ba sarung duku ilang nya chukup alus sereta manah dipeda ngujungka iya nyelai dipeda.

Pengawa ngambuh besi tu mega nyadi pun penatai pemisi dikena melanja ruang bilik iya seraya madahka senyata tu ngembuan mayuh bansa enggau ukir.

“Keterubah iya, mata duku nya digaga ari besi ti diambi ari bilah geraji rantai tauka besi ‘spring’ ari kereban van tauka lori.

“Komponen kedua tu iya nya ulu duku digaga ari kayu tauka tanduk rusa kelimpah sarung duku ngena mayuh bansa kayu lalu diukir nitihka pengelandik enggau penau,” ku Johnny nerangka rurun ngaga duku.

“Ulu enggau sarung duku ditanchang manah ngena tali wi ke alai tanchang ba sarung nya dikumbai Pusat Bedus lalu tanchang ba ulu duku dikumbai Temurak.

“Enti diperati enggau silik, ba ulu duku nya bisi lambar buk orang dulu kelia diambi ari pala munsuh ke udah didengah tang diatu kitai ngena lambar buk pelesu,”ku iya.

Ketegal ngembuan jerita lama, Duku Ilang chukup dikenangi dataika sehari tu taja duku nya diatu suah agi diambuh nyadi tanda kenang lebuh nemuai ke Sarawak.

Nambahka nya, Johnny mega madahka iya begunaka dua hari ngambuh Duku Ilang ke alai 20 duku mujur diambuh ninting bulan kelebih nyadi tanda kenang bala temuai lebuh nemuai kitu.

“Tang, Duku Ilang ti diudar khas deka lama diambu laban pemar ngambuh duku enggau nitihka pengalus sereta ukir ba sarung duku nya.

Berebak enggau nya, Johnny madahka diri nyual duku ke bisi sarung nya entara RM200 ngagai RM350.

“Sida ti ngudar khas, deka digaga ulu duku ari tanduk rusa enggau sarung digaga ari kayu tebelian ti ngembuan ukir ti chukup alus sereta manah nya berega manggai RM1,000 nyentuk RM2,000,” ku iya.

Johnny mega madahka duku ti pemadu manah enggau nyelai kala digaga iya nya Duku Ilang Gajah laban duku ke besai enggau digaga khas ungkup dipandang beserimbai enggau Hari Kraf Renggat Nasional berapa taun ke udah.

“Dataika sehari tu, nadai sapa berani meli laban rega pemadu baru nya dijual aku berega RM15,000,” terang iya.

Berindik ari nya, iya suah mindah ngagai Miri, Bintulu, Sarikei enggau Kapit ngambi nyual kediri duku digaga iya nya.

Kelimpah deka ngiga orang ke meli duku, iya ngena awak tu meli mayuh bansa kayu ti bekualiti enggau tanduk rusa ari peranak rumah panjai ba kandang menua ulu enggau menua pesisir ke kala dilawa iya.

“Aku mega suah diundang ngagai ekspo enggau eksibisyen Kraftangan Malaysia. Aku chukup beterima kasih ngagai piak sida ke mayuh mantu aku ba pengawa tu kelimpah suah nganjung aku nyereta kus betukang kelimpah nempa aku nyadi siku orang ke landik ngambuh duku ti bekualiti.

“Diatu, aku suah dikangau nyadi pengelicha ba licha enggau kus diatur mayuh ejensi di menua tu bekaul enggau asil pengelandik jari kelebih agi ngiri enggau ngajar penyereta chara ngambuh enggau ngukir duku ke alus sereta nyelai dipeda,” ku iya nusuika peneleba diri.