Rega lada niki 60 peratus

KUCHING: Rega lada burak enggau chelum di menua tu niki 60 peratus.

Menteri Dandang Besai enggau Komoditi Malaysia Datuk Dr Mohd Khairuddin Azman Razali madahka rega lada diatu niki taja bisi labuh apin lama.

“Tu nyadi peransang ngagai rayat menua ngemanahka baru kebun lada sida awakka industri tu ngerembai.

“Lada burak dijual RM21,000 setan lalu lada chelum dijual RM12,000 setan,” ku iya.

Mohd Khairuddin bejaku munyi nya ba aum media sebedau ngelawa Palan Projek Pemansang enggau Pengerembai Industri Lada Menua (ILN) di Semenggok ditu, kemari.

Ku iya, sebedau tu orang ti nanam lada kurang bulih bantu ari opis menteri pasal pengawa ngintu sereta nanam lada.

“Kenyau aku tama dalam opis menteri, kamu udah ngagihka penyampau ti besai ngagai orang bekebun mit lada dikena ngemansangka kebun sida iya nya RM16.11 juta ba taun 2020, sebagi ari pakej mantu orang kebun ti kena pangka Covid-19.

“Taun tu, bantu deka diteruska lalu kitai deka minta baru agih belanja dalam Langgur Pemansang Lumpar Ke-12 (RMK12) dikena mantu pekebun lada mit mungkur bantu ungkup Opis Betanam Betupi Sarawak,” ku iya.

Iya madahka, opis menteri sida dalam perambu muka keretas kereja ngemesaika guna lada.

“Aku minta guna lada patut dikemesai mungkur rempah enggau ke bukai.

“Keretas kereja tu digaga ngambika kitai enda semina bepanggai ngagai lada aja.

“Kelimpah ari nya, kitai deka meda pengawa nanam lada majak dikerembai ngagai rayat di Semenanjung Malaysia baka Johor enggau menua bukai,” ku iya.

Suara Sarawak