Rega sayur mega niki

KOTA SAMARAHAN: Musim landas enggau bah meri pangka ngagai rega sereta bekal sayur Kota Samarahan enggau Kuching.
Pedaja sayur ba Makit Bandar Riyal Florinsia Philip madah iya nadai nanam sayur ke dijual nya tang ngangkat ari pemekal.
“Maya tu, aku ngabiska bekal sayur ke udah diangkat baka limau, chabi, seras, lengkuas enggau kunyit.
“Enda ulih dikeengai maya musin landas enggau bah tu, utai tanam endang kena pangka nyema bisi pan dijual enggau rega ke mar mimit,” ku iya madah ngagai Suara Sarawak, kemari.
Tandu Florinsia, bala pedaja ke mayuh ngelala bala pemekal sida nyamai bulih sayur ngambika bisi dijual.

“Bebida enggau aku semina ngangkatka sayur ba siku tauka dua iku pemekal aja.
“Maya pemekal nya nadai nganjung sayur, nyadi aku putus bekal sayur jam ke diatu,” ku iya.
Ba pekara bekaul, Florinsia madah rega barang ke dijual iya mega bepanggai ngagai rega maya ngangkat ari pemekal.
“Nyema pemekal nyendiaka rega tinggi nyadi aku sigi nikika rega mimit ungkup bala penguna.
“Taja pia, aku agi bisi bejualka chabi, limau, serai, kunyit RM2 seikat enggau mega dijual kilo,” ku iya.

Nangkan ke nya, pedaja ba Medan Niaga Satok Nur Rina Abdullah madah, bekal sayur iya nadai kurang semina rega maya ngangkat ari bala pemekal diatu bisi niki mimit.
“Aku bejual sayur tu ukai ngira untung aja, tang aku deka orang bisi sayur dibeli.
“Taja rega sayur mar mimit diatu, lebuh penguna minta kurang aku tetap nyual ngagai sida.
Dulu ari nya, perati Suara Sarawak kemari meda semina sayur baka kantuk bandung, ulam raja, terung, petai enggau tomato mayuh dijual ba makit nya.