LINGGA: Perais besai RM15,000 benung nganti pengempu gelar Raja Sungai Ungkup Regata Lingga 2023 ti deka diatur kena 7 nyentuk 10 Disember tu.
Nya alai, Komiti Pengatur Regata Lingga 2023 meransang mensia mayuh ngambi bagi ba pekit lumba perau nya dikena ngerebut perais besai nya.
Haribulan kepenudi ngerejister diri masuk pekit nya kena 29 November tu pukul 9 pagi lalu pekit nya deka diatur ba Sungai Lingga.
Regata Lingga sekali tu bisi nyelai agi ari taun ti udah laban bisi nyendia kategori Dikangau Khas ungkup Bidar 30 Battle of Titan.
Entara pekit lumba perau ti deka diatur lebuh nya ila baka Bidar 8, Bidar 15, Bidar 20, Bidar 25 enggau Bidar 30 (Raja Sungai).
Pia mega, bela diatur pekit lumba perau Dikangau Khas baka Pechut Bidar 8, Pechut Bidar 15, Pechut Bidar 20, Pechut Bidar 25 enggau Pechut Bidar 30.
Mensia mayuh ti deka nemu silik bekaul pekit nya diperansang betelefon terus ngagai Awang Irwandy Awang Yaman ba lumur 010-8226004.
Sida mega diperansang skan QR Code ti diberi enti deka nemu silik bekaul atur pekit nya enggau ngulih pom rejister masuk pekit nya.
