SARATOK: Perais mata duit sepenyampau RM15,000 nganti champion Raja Ai Regata Saratok taun tu.
Kaban Parlimen Saratok, Datuk Ali Biju madah, nya perais pemadu besai kala disedia sekumbang Regata Saratok diatur di menua nya.
Ku iya, perais nya engka pemadu besai kala disediaka bala pengatur pengerami regata tauka pekit lumba perau di Sarawak naka diatu.
“Aku empu berasai gagit endar ati lebuh ninga pemesai perais disebut enggau dipesetuju bala kami lebuh baum tadi.
“Aku pechaya perais tu deka nyadika peransang bala tim lumba perau ransing agi belatih lalu ulih nempa pemujur.
“Nya alai, aku meransang bala kita udah tau nyendiaka diri berengkah ari diatu ngerebut perais tu ila,” ku iya.
Ali mansutka jaku pengudah ngulu aum Pesta Saratok 2022 ditu tadi ti berandauka hari bulan enggau tusun bemacham aktiviti nyerumba pengerami nya ila.
Ke penerang, Pesta Saratok deka diatur seminggu berengkah ari 25 nyentuk 31 Julai berambaika jaku “Tuk Lah Saratok”.
Batang tuju pengerami nya dikena matak penatai mensia mayuh kelebih agi ari menua bukai ngambi ngelala enggau nemu pengudah ke bisi ba sitak Parlimen Saratok.
“Kitai mega deka nyaup rayat kelebih agi bala pedagang ditu nyungkak ekonomi sida nengah aktiviti diatur serimbai enggau pengerami tu.
“Kelimpah ari Regata Saratok, kitai mega deka ngatur sekeda program lumba enggau malam main asal kandang seminggu berami nya.
“Tu dikena kitai matak enggau meransang raban nembiak menua tu ngambi regas ngaul diri terus ba semua atur aktiviti,” terang Ali.
Ejensi bisi ngaul diri ngemujurka Pesta Saratok taun tu Palan Servis P.205 Saratok, Opis Residen Bagi Menua Betong, Opis Pelilih Saratok, Kaunsil Pelilih Saratok, Opis Pemadah Saratok enggau Opis Bomba Enggau Penyah Penusah Malaysia (JBPM) Saratok.
Raban Polis DiRaja Malaysia, Raban Volunteer Malaysia (Rela), Raban Nyaga Orang Periman Malaysia, Kaunsil Sungai Sarawak, Opis Kereja Raya (JKR) enggau Saberkas Kalaka mega bisi dikaul.
Pom nyereta pekit Lumba Perau deka dikeluar kena 4 Julai 2022 lalu haribulan kepenudi nganjung pom ditetapka 21 Julai 2022.
Sebarang penerang tauka bisi utai deka ditanya pasal pekit tu tau betanya ngagai Wan Ismail ba lumur 0164407265.
