Remang cumulus nentuka pemujur OPA

KUCHING: Operasyen Ngaga Mua Hari (OPA) ti dipejalai berengkah kemari begunaka remang bansa ‘towering cumulus’ ngambika besai agi peluang mansutka ujan.

Mandal Direktor Opis Metrologi Malaysia (Sarawak) Siniarovina Urban Sinyau madahka sida begunaka remang ti besai awakka muntang agi ngaga OPA.

“Ngelama tu kami ngaga OPA ngena remang ti mit (small dot) tang sehari tu (kemari) kami ngiga remang bansa ‘towering cumulus’ ti besai sereta muntang ngelabuhka ujan enti udah bekumpul mayuh.

“OPA tu dipejalai ngambika remang ‘cumulus’ majak bekumpul lalu nyadi ‘cumulonimbus’ remang ti ngandut ai lalu labuh nyadi ujan,” terang iya.

Siniarovina bejaku munyi nya lebuh meri penerang pasal OPA ngagai pemberita ba Pengkalan TUDM ditu pagi tadi.

MERI SUKUNG… Uggah (lima kiba) lebuh ngelawa palan penerebai bilun C130 ba Pengkalan TUDM ditu, tadi. – Gambar NADIM BOKHARI.