Renggat baruh patut nemu juluk parti

BELADIN: Bala kaban parti kelebih agi ba renggat baruh patut meretika pengawa ditegika Gempung Parti Sarawak (GPS) ngambika nyamai endur sida nerang ngagai orang bukai nyengkaum bala pengundi.

Adun Beting Maro Razaili Gapor madah, pekara bekaul enggau Sempekat Malaysia 1963 (MA63), Perkara 18, Suruhanjaya Cobbold, Kanun Tanah Sarawak (Ubah) 2018 enggau ke bukai patut ditemu sida silik.

Ku iya, tu nyengkaum empat pekara di baruh MA63 ti enda dikerandau enggau Perintah Besai Pakatan Harapan (PH) ba mua mayuh baka nyemetak disebut Kepala Menteri Datuk Patinggi Abang Johari Tun Openg.

“Empat pekara tu iya nya kuasa otonomi imigresyen, hak neritka undang-undang nengeri nitihka Konstitusyen Perintah Besai, nyaga garis entara menua enggau lansar tasik, baruh tanah enggau semua asil iya.

“Kitai beratika bala penyakal (di Sarawak) rindu amat betalatka penemu pasal pekara ti bula, jaku petenah enggau nunsangka reti jaku ke bendar.

“Nya alai kitai dekaka bala pengundi enggau kaban parti renggat baruh patut meretika pengawa ditegika GPS ngambika sida enda alah ajum ari jaku petenah nya,” ku iya.

Suara Sarawak