Rentap: Bujang Berani ukai lanun

KUCHING: Akademi Serakup Dayak Iban Sarawak (Asadia) balat mejah penemu ngumbai Bujang Berani Rentap enggau Linggir Mali Lebu nya lanun.

Ketuai Asadia Mabong Unggang madah, penemu nya penemu ti salah sereta mapap lalu jaku leka ‘lanun’ nya enda patut dikena ngelar orang ke bebunuh seput ngetanka menua.

“Orang baka Rentap enggau Linggir sereta bujang berani bukai enda patut patut dikumbai lanun laban sida tu orang ti ngenan sereta nyaga menua ari ti dipegai bansa bukai baka James Brooke.

“Chara seduai iya ngenan ke menua ari ti dirumpak bansa bukai ukai enggau chara belalai tauka ngipa sengapa lalu nyerang belalai maya orang enda ngadang tang terang angkat ngelaban lalu mantaika pengeringat diri,” ku iya madah nyemetak.

Iya mansutka penemu tu dikena nimbal sebengkah kenang sejarah baka ] dibantai ba surat kabar Jaku English dalam menua tu, empai lama.

Mabong Unggang

Pengarang nya bisi nulis ba taun 1849, lebuh Perang Beting Maro, Brooke ngalahka Linggir iya nya ketuai lanun Iban.
Lebuh nya bisi 75 buah perau enggau 3,500 iku lelaki ngarika Brooke. Brooke ngaga kuta di Lingga enggau ba nanga Sungai Skrang di Batang Lupar nangika diserang baru nangkan nya.

Pengarang nya mega madah, ba taun 1861, udah alah di tasik, lanun ti betuaika Libau tauka dikelala agi enggau nama Rentap ngelarika diri ke ulu agi lalu majakka pengawa ngayau.

Mabong madah, James Brooke empu meri basa ngagai Rentap ari leka jaku iya ti ngumbai Rentap nya ‘Rajah Ulu’ lalu lebuh Rentap nyurut kediri ngagai Ulu Julau, James Brooke bisi ngasuh bansa laut benama Abang Aing, bisi ngumbai nya Abang Sarkawi, madahka diri deka betemu sereta bebaik enggau Rentap.

Taja pia ku iya, Rentap tegap penemu enggai betemu enggau orang ti ngerumpak menua diri.
“Ari basa James Brooke nya enda patut Rentap tauka Linggir dikumbai lanun.

“Enti James Brooke ke nyadi munsuh Rentap bebasa ke Rentap, nama kebuah penulis kemaya hari tu baka ba sebengkah surat kabar agi ngumbai Bujang Berani ke ngenan menua nya lanun.

“Pia mega baka Linggir, enda patut Linggir ngemai beratus buah perahu ti ditepan beratus iku bala Iban deka ngerumpak,” ku iya madah.

Mabong madah, penulis orang putih sigi enda nanahka orang ngempu menua ti ngenanka menua laban sida iya enda ulih sepeneka ati ngerampas pengeraja menua Sarawak jeman nya ketegal ditanka Bujang Berani Iban.

“Nya alai sida iya ngena chara psikologi tauka penemu runding ti ngumbai bala Bujang Berani orang jai tauka lanun ngambika bansa iya empu pan enda rindu ke sida.

“Sigi ditulis dalam bup tuju ati sida iya deka nyerang perintah James Brookes.

“Tang dikena ngelalaika penyai ulah James Brooke enggau soldadu upah dia orang putih ngumbai Bujang Berani Linggir enggau Rentap tu lanun.

“Nya mega dikena iya ngemanah ke diri ba dunya luar ngambika perintah menua luar enda ngutuk ulah sida (James Brooke),” pia ku iya nerang.

Iya minta bala penulis anang ngemaruh sereta bejai Bujang Berani ti berambun ke seput ngenan ke menua.

“Arapka sejarah dipeda ari pemerani enggau pengeransing ati bala Bujang Berani ngenan ke menua ari ti dipegai sereta dikeruga bansa bukai ari menua sebali hari.
“Anang ngemaruh sereta bejai Bujang Berani ti berambun ke seput ngenan ke menua.

“Bansa kitai patut berakup, sepenemu sereta sejalai meresi nama Bujang Berani kitai kelia ti dikumbai lanun.

“Enti enda, bansa Iban jemah ila deka dipetenah datai ari turun Lanun.

“Nya meh utai ti dikeenggai kitai,” ku iya madah.