KAPIT: Pengerapit kaul bebakih entara Annie Anthony Belikau enggau Seria Agoi nyadi pun penumbuh dagang S&A Bridal Decoration Services.
Ku Annie, resia baka ni chap dagang kunsi nya ditumbuh mega asil buah runding nyantilka urup ba pun nama kami duai, iya nya S nya Seria enggau A nya Annie.
“Kami duai bebakih laban bela gawa ba opis pelajar dalam taun 2004. Iya gawa ba Opis pelajar aku gawa ba sekula, di Sekula Primari (SK) Kapit, sama bela nyadi kerani kami duai.
“Taja kami duai enda sama endur gawa tang endang suah begulai kin kia enti bisi pengawa ke ngaul kami.
“Iya tu siku bakih ke chukup menstas enggau siru sereta likun agi ngaga semua kereja jari.
“Aku siku orang ti endang rindu meda utai ti manah baka pengawa ke digaga ari pengelandik jari,” ku Annie ngepunka kenang begulai enggau Suara Sarawak.
Ke penerang, Annie asal ari Rumah Inguh Sungai Paku Mujong, Baleh seraya Seria ari Rumah Brian, Punan Bah di Belaga, indu Punan belaki jadi enggau bansa Iban.
MUKA DAGANG
Pemuas bepedaka magazine, program televisyen, Facebook, Instagram enggau pelasar media rama bukai pasal orang ke nganta enggau begagaka buk, dia iya terunding deka muka salon enggau servis nganta.
Tambah mega Annie empu endang orang ti rindu dipeda gap enggau kemas laban enggai dipeda orang memusu, rindu ngias diri empu enggau orang bukai mega.
“Laban kami duai ke bebakih endar, dia aku madah ngagai Seria pasal niat ba ati deka muka dagang salon enggau servis nganta nya suba.
“Baka selama, Seria endang nadai mayuh leman lalu madahka diri deka bekunsi enggau aku sereta nyebut jaku munyi tu; anang ninggalka aku, untung rugi tua sama nanggung.
“Jaku dipansutka iya nya ngasuh ati aku baka ditegu enggau pemanah enggau pementas iya ke nyadi bakih, taja kami duai ukai segetah sedarah,” ku Annie nampung randau.
Ba taun 2014, seduai sebakih lalu begagaka lisin dagang ngambi ulih muka salon lalu ngiga dini endur bisi ngatur kus tauka bengkel begagaka buk enggau nganta.
Mujur endur lebuh nya Tampak Pegari di Sibu ti diempu Rose Chukan bisi ngatur Bengkel Ngaga Buk enggau Nganta lalu seduai bulih setipikit baka dijuluk ati.
“Salon Kami duai bisi dua iku pengereja ti endang orang udah bisi peneleba, penau sereta pengelantik begagaka buk enggau beguntin, benama Winnie Gerunsin enggau Tehirih Undi.
“Taja pia, pejalai dagang salon semina beretan tiga taun aja ketegal pengereja kami duai ngetu laban siku nya nyau nampung pelajar sekula seraya siku da beribunka anak,” ku iya ngelansa pasal dagang salon seduai sebakih.
NGEREMBAIKA PENEMU
Dalam timpuh nya mega, Annie enggau Seria bisi ati deka nyendiaka servis ngiga panggau orang berami melah piang, beterang jadi melaki bini.
Bai ati keran, seduai lalu ngiga ba google dini endur bisi ngatur kus enggau bengkel lalu tetemuka Butik Bunga Rampai ba Selanggor din.
“Lebuh nya kami duai sama ngambi kemisi lalu nurun kin laban deka ngulu Kus Pengelandik Ngaga enggau Ngelagu Panggau Melah Pinang pengelama tiga hari.
“Ba taun 2016, kami duai udah belabuh nyendiaka servis ngaga panggau orang ti berami melah pinang lalu disaup anak menyadi aku benama Maureen tauka Oyie ke gawa nyambil.
“Timbal diterima ba dagang S&A Decoration Services manah endar laban kami duai nyendiaka pakej rega ulih ditangkup penguna servis.
“Rega diletak kami duai mega bepanggai ba dini endur panggau nya deka digaga lalu penyauh menua ke dilawa laban berundingka ungkus mai kereban enggau gaji pengereja,” terang Annie.
LANDIK BEDAGANG
Ukai semina nya aja, Annie enggau Seria tu sama bela bisi ngaga sereta bejualka produk kraf ari pengelandik jari baka indu Iban ke bukai.
Seduai sama ampit enggau nengkebang enggau nyual kain burie, selampai burie, marik burie, manik sereta bisi ngaga dress kontemporari ari kain chura pua kumbu enggau burie.
Seduai sebakih mega kala melanja dress kontemporari dikena bala indu dara lebuh bepekit Pengerami Budaya Dayak Borneo (BDCF) di Sibu ba taun 2018.
“Terima kasih ngagai raban Sarakup Indu Dayak Sarawak (SIDS) laban udah pechayaka keranjai jari kami dikena sida ba renggat kedua kepenudi pekit nya.
“Tu entara kenang berega ngagai kami duai ti nyadika peransang kaki nyingkang jauh agi ba dunya dagang kraf nunda singkang bala ke udah dulu nyulut,” ku Annie madah baru.
Ba taun 2019, seduai sebakih sekali agi melanja bala ex-Miss Grand Sarawak 2018 ti mandangka fesyen atas panggau bekenaka kain enggau baju burie nyerumba Pekit Miss Grand Kapit taun 2019.
Pekit nya suba diatur bala komiti besai Pekit Miss Grand Sarawak ti betuaika Teresa enggau Adina Sana, orang ti tebilang nama, tampak rita ngatur pekit pemajik gamal.
Kenang manis ba tubuh Annie empu lebuh bini Adun Pelagus, Wilson Nyabong Ijang iya nya Seriah Thomas udah meli baju burie ke uchu iya.
BEDUA PENEMU
Kelimpah ari bedagang, Annie enggau Seria bisi ngatur kelas begagaka kain burie, seduai sama nyadi pengatur enggau pengajar.
“Kenduai Seria kira bisi empat kali udah ngajar tauka ngatur kelas ungkup bala ke indu ditu begagaka kain burie ditu.
“Lebuh maya bisi pengerami diatur di Kapit enggau ba Sibu, kami duai semampai enggau orang ngambi bagi bejualka asil pengelandik jari.
“Maya bisi pengerami baka tu mih dikena kami duai ngelakuka produk ari burie, manik enggau macham utai ke bukai,” ku iya nampung kenang ke ujung agi.
Annie madah, sukung tegut ari diri sebilik endang nyadika peransang besai ngagai seduai sebakih ba semua pengawa dikereja nyengkaum dagang.
“Pengawa ke digaga kami duai tu endang bisi sukung ari sebilik kelebih agi laki, anak, menyadi pia mega bala bakih.
“Enti nadai sukung sida nya, nadai ulih tekerejaka pengawa baka tu kami duai, engka enda tepujurka dagang baka diatu.
“Aku endang ngaku diri mayuh pengelemi lebuh bedagang enggau pengawa ba ruang bilik, tang bai ati rindu enggau niat ngiga penemu baru, ngasuh kami duai bela meransang diri.
“Laban ngasaika diri agi pabu penemu, dia kami duai semampai ngiga jalai ngulih, ngiri enggau nyerungkai penemu baru bekenaka teknologi.
“Munyi ku nembiak jeman diatu, semua utai ba ujung jari, bepanggai ba pengepuh enggau pengeransing diri empu begiga, ukai baka nurun gawa ke tanah ngelaban panas ujan,” ku Annie lalu ketawa.
MACHAM SERVIS
Sebedau nyimpul randau, pemungkal begulai S&A Bridal Decoration Services nya madah, barang sapa deka nemu silik pakej, servis tauka perengka ngepan tau ngelawa Facebbok seduai, Seria Andrea enggau AnakApai Belikau.
“Kami bisi nyual enggau servis nyuwa perengka kraf ari burie, manik, ngepan asal Dayak Iban enggau Orang Ulu.
“Pia mega ngagai sida ti deka nyuwa gaun ari ari kain pua kumbu tauka deka nyuwa ngepan asal munyi dipadah aku tadi, anang malu betanya ngagai kami duai.
“Ngena peluang tu, meri besai terima kasih ngagai semua ti udah nyukung pengawa enggau dagang kami duai Seria kenyau ari terubah bedagang suba,” ku Annie.
