Ninting taun sebedau hari Gawai Dayak nyadi kena 1 enggau 2 June dia tebal agi bansa Dayak suah ngintu sebengkah pengerami dikumbai Mantar Gawai. Nama reti Mantar Gawai?
Seninjik bendar kena 21 Mei tu tadi, bisi Pengerami Mantar Gawai Dayak diatur tiga palan makai ba Kuching City Mall iya nya MK Smoke House, Smoky George enggau Loogan Roadhousehouse disaup Gerempung Anak Seni Iban Malaysia (Pasima).
Sama bisi datai ngemujurka pengerami tu iya nya Presiden Pasima, Pengajar Isa Lee sereta bala kaban Pasima iya nya Nicholl Ragai Lang, Roselind Muntai Belon, Abong Amping enggau Lee Ramos sereta siku kaban polis, Tuan Morebon anak Manju.
Nya alai, maya pengerami nya penulis ngambi peluang ngerandau siku orang ke tebangkar ba pengawa main asal Iban ke mega kala gawai ba Radio Televisyen Malaysia (RTM), Nicholl Ragai Lang,79, minta iya bekunsika penemu enggau lebih silik pasal reti enggau tusun pengawa Mantar Gawai.
Kenu ku iya, kebendar reti Mantar Gawai tu iya nya pengerami sehari sebedau Gawai nyadi. Tuju pengawa tu diatu dikena nyendiaka pemakai dikena ngintu Gawai.
“Iban di rumah panjai dikena Mantar Gawai dia sida iya bisi munuh jelu nyadika lauk, ngelulun beras pulut dalam ruas awakka bisi diempa maya Gawai.
“Tusun keterubah digaga mua ke pagi hari Mantar Gawai iya nya beranchau puang. Genap pintu bilik nganchau tikai ba ruai diri lalu tu mih pengawa dikereja sepanjai hari nya.
“Lemai nya, kira hari udah petang dia bisi sebengkah pengawa dikumbai ‘ngabas bubu’.
“Reti jaku ngabas bubu tu iya nya nyepi ai tuak ari sepintu bilik ke bilik siti diuluka Tuai Gawai.
“Maya pengawa tu enti bisi tuak orang nya masam, dia orang ke mayuh tuai deka meri tudah awakka sama bisi ai tuak dikena ngintu Gawai.
“Tu mih penyiru ke dikembuan kitai bansa kenyau ari kelia lalu mandangka penyerakup enggau diri serumah,” ku Nicholl.
Udah pengawa nya tembu, ku Nicholl lalu diatur pengawa makai serumpu ungkup diri sebilik.
Nyadi sebedau sida sebilik berengkah makai, dia tuai bilik tauka apai dulu meri jaku ajar ngagai semua sida sebilik. Udah badu makai, baru orang belabuh miring ba ruai diri empu.
Udah nya nya mega, bisi diatur bemacham main tauka aktiviti dikena nganti pukul 12 tengah malam.
Malam 31 haribulan nya mega bisi diatur pengawa ngetas ranyai. Pun ranyai tu tadi selalu iya diduduka pagi nya dikena nyendiaka diri nyambut Gawai, ku Nicholl.
“Sekayu rumah panjai bela bisi nganjung pemakai ke ulih disangking ba pun ranyai.
“Buah ranyai tu kebendar dikumbai orang kelia ngayuka pengaruh manah. Nya mih kebuah orang ke diasuh dulu ngetas ranyai enda tau enda orang ke tuai bulu tauka kala basah jari.
“Tang kemaya hari tu laban kitai ke nyau nadai agi bekayau baka kelia dia orang ke engkeman diasuh dulu ngetas ranyai iya nya sida ke gawa nyaga pengelikun menua baka raban polis, soldadu enggau ke bukai,” ku Nicholl nerang enggau nyemetak.
CHARA NGATUR PENGIDUP MESTI BERUBAH
Nangkan ke nya, beserimbai enggau pengerami Gawai Dayak 2022 dia Nicholl bisi ninggalka jaku pesan nuju rebak baru.
Ku iya, Gawai Dayak tu diintu dikena mai reti kitai ninggalka taun lama lalu ngepunka taun baru.
“Ari nya tadi, penemu kitai bansa patut berubah ngiga pengidup ke lebih menyana. Ari chara ke lama mesti berubah nitihka chara baru ngambika kitai tau teulihka pemujur lebih agi ari taun ke udah.
“Ba sentang nembiak ke benung besekula tu pekara lumur satu mesti dikemeratka bansa bansa kitai laban pemandai sekula kunchi pemansang bansa.
“Pesan Gawai Dayak, aku meri besai terima kasih ngagai Petara ti udah ngemanjai umur kitai begulai sama enggau diri sebilik, diri serumah, sama rami nyambut Gawai Dayak.
“Minta niat, minta berekat, minta semua gerai nyamai gayu guru gerai nyamai lantang senang, sama bulih duit, bulih ringgit bulih pengaya bulih pengeraja, lantang senang nguan menua,” ku iya.
Ngelansa pasal pengerami malam nya, dia Tuai Gawai, Lee Ramos madah pengerami nya diatur dikena nyerakup kaul entara tiga palan makai enggau mensia mayuh kelimpah dikena mantaika main asal Iban.
Entara main asal ke bisi dibantaika malam nya baka bepantun disadaka Roselind Muntai, mandangka ajat bansa Iban, tanda Bidayuh enggau tanda Datun Julud (Orang Ulu) ari Kelab Ngajat Siburan, mendingka leka Timang Gawai disadaka Nicholl Ragai Lang, Ngetas Ranyai, nebah gendang pampat ari Gerempung Gendang Pampat Sereta Main Asal Iban Kuching enggau ke bukai.
Berebak enggau nya, siku orang ke chukup tebilang bepantun ba menua Sarawak, Roselind Muntai anak Belon, 53 maya dirandau penulis bekaul enggau peneleba diri ba pengawa bepantun madah iya bepun chakah dibai orang bepantun ari taun 2000.
Iya madah diri suah dikangau sida RTM ngerikod pantun. Pengerindu ba pengawa bepantun ku iya bepun ari mit.
“Kelia nadai mayuh main, kami diajar sida niang indai bepantun. Tuju pantun ti dikena mantaika pengasai ati kitai.
“Udah nya, suah mega aku diasuh orang bepantun dikena ngading orang bepangkat besai.
“Taja pia, kitai patut nemu bepantun tu mayuh leman iya nya bisi pantun uti, pantun puji, pantun sinu, pantun peransang enggau ke bukai,” ku iya nusui ngagai penulis.
Nangkan ke nya, Roselind madah diri suah diambi bala pemesai nyadaka pantun peransang ungkup bala pengari rayat lebuh bisi program tauka pengerami.
Roselind mega ngelalau rebak baru anang lembau ngangkatka main asal kitai Iban baka bepantun, besanggai, beramban enggau ke bukai ngambika enda lenyau ngapa ditelan jeman.
ARAP TERUS MUJUR…Tiga pengempu palan makai ba Kuching City Mall iya nya MK Smoke House, Smoky George enggau Logan Rock House begambar enggau pemantun Iban ari Gerempung Anak Seni Iban Malaysia (Pasima), Roselind Muntai (dua kanan).
