RGC ditumbuh nyadi strategi pemansang menua pesisir

KUCHING: Perintah Sarawak merambu pemansang sekeda palan pemansang gentutung pendiau (RGC) ti nyadi siti strategi ungkup transformasyen menua pesisir, ku Tuai Pemegai Menua Tun Abdul Taib Mahmud.

Ku iya ba pekara nya, pengawa nyendiaka perengkaguna ba genap RGC chukup beguna dikena nyukung pengawa ekonomi sereta nambahka tikas pengidup rayat.

“Transformasyen menua pesisir begunaka sektor swasta bela sama meranakka puju ba menua pesisir ti ulih ngemansangka penau ekonomi baka Tanjung Manis, Bakun, Murim, Tunoh, Baram, Sematan enggau Merapok.

“Chara tu ulih meri bekau positif ngagai komuniti menua nya ari sukut dagang enggau pengereja pengawa,” ku iya ba jaku pesan Hari Gawai 2020.

Nya alai, Tun Taib pechaya transfomasyen menua pesisir nya ulih ngerapitka takah pemansang entara mengeri enggau menua pesisir.

“Sarawak chukup kaya enggau tanah ti ulih dikemansang enggau pengawa betanam betupi.

“Nya alai kitai meseti bebendar ngemansangka tanah Sarawak nengah chara numbuhka pengawa puang lalu nambahka agi peluang bedagang kelebih agi ngagai peranak ba menua pesisir,” ku iya.

Ku iya, perintah mega udah ngelangkar polisi dikena numbuhka industri bepelasarka pengawa betanam betupi ti ngembuan penau ti chukup besai.

“Taja pia, pengawa betanam betupi moden ngasuh kitai bejalai seriris enggau jam seruran ngiga chara ti manah dikena ngemansangka ladang tauka kebun enggau strategik.

“Nya alai, rayat meseti nyikap diri ngerebut peluang ti deka datai ba pemansang tu,” ku iya.

Ku Tun Taib, sekeda penemu enggau pengelandik mesetik disikap ngagai raban nembiak ngambika sida tau bulih pelajar enggau latih ti patut.

“Di Sarawak, urung 44 peratus rayat ke agi diau ba menua pesisir bisi penau tu besai ulih dikemansang.

“Nya alai, menua pesisir Sarawak enggau saiz ti chukup besai begunaka infrastruktur baka penyambung ngagai pengawa pelajar enggau pengerai.

“Tu reti iya, agenda pemansang Perintah Sarawak ukai semina dikena nyapai juluk tikas nengeri ngembuan penatai pemisi ringgi tang mega mansang manggai taun 2030,” ku iya.