Rh Albert nyau deka bebadi angus

SARIKEI: Penyikar mujur nyelamatka Rumah Albert, Jalai Selalang, Nyabor ditu ari angus lengis malam tadi.

Ketuai Balai enggau Penyah Penusah Sarikei, PgPB Mahmudin Narudin madahka penusah nyadi urung pukul 10.40 malam nya lebuh nyau deka semua peranak dia udah terenah belelak.

Ku iya, sida Albert serumah benasip endar laban agi bisi orang sedarka penusah nya lalu berumban madamka api sebedau nyerarai ngagai endur bukai ngena kereban pengerara api.

“Nasip endar bisi orang ke sikar enggau lanchat ngereja pengawa, enti enda rumah panjai dua ringkat pemanjai 19 pintu bilik nya udah angus lengis demalam,” ku iya.

Mahmudin madah, penusah nyadi ba sebuah pangking ba ringkat atas rumah panjai nya.

“Semina 10 peratus aja angus lalu api mujur dipadam sida serumah kelimpah nadai penusah bebadi nyawa tauka bakal diripot nyadi.

“Pun penusah nyadi agi dipansik,” ku iya.

Suara Sarawak