Rh Alo Ngemah Ili dituntung penusah angus kena malam 9 Febuari 2018 ti ngujungka 145 iku peranak rumah panjai semina tinggal gari ba batang tubuh.

LUBOK ANTU: Kaban Parlimen Lubok Antu Jugah Muyang ngungkupka agih belanjaRM65,000 dikena peranak Rumah Alo, Ngemah Ili, Lemanak ngentak rumah baru .

Beduduk ari pemeri agih belanja nya, Jugah ngarapka kaul rat entara kedua piak iya nya perintah enggau rayat terus meruan ungkup pemansang pelilih menua nya.

“Ngintu pengerami hari besai ba menua tu amat beguna ngagai penyerakup ba mayuh pupu bansa rayat.

“Penyerakup pupu bansa di menua tu mega beguna dikena kitai terus nyingkang mansang ke mua,” ku iya.

Jugah madahka pekara nya rambau bejadi Pengerami Ngiling Bidai Rumah Alo, Ngemah Ili, Lemanak, kemari.

Kelimpah ari nya, Jugah madah pemanah politik ulih digaga seriris enggau pemansang nyema mensia beserakup.

“Sukut tu nyadi pelasar perintah merambu enggau bejalaika pemansang ba genturung pendiau peranak kandang menua enti beserakup.

“Tanggungpengawa ketuai perintah besai, kerejasama enggau sukung ketuai kampung nyadi jematan ngaga kaul enggau perintah,” ku iya nerang.

Nangkan nya, iya madah pengawa bejalaika pemansang baka jalai alun, bekal ai beresi, pemansang pelajar enggau pengelantang peranak menua pesisir endang tetap diperatika dulu.

“Teju ke tisi dulu runding politik kitai kena nyapai pemansang tu.

“Sepenemu begulai enggau semua orang ngambika semua kitai tau bulih pengelantang jemah,” ku iya seraya ngarapka bantu ti diberi deka diguna enggau manah.

Ungkup penemu, Rh Alo Ngemah Ili dituntung penusah angus kena malam 9 Febuari 2018 ti ngujungka 145 iku peranak rumah panjai semina tinggal gari ba batang tubuh aja.

Sama bisi datai ba pengerami nya Pemesai Opis Pelajar Pelilih Lubok Antu Jim Andrew Janggi, Tuai Rumah Alo, bala tuai rumah ke besemak pelilih menua sereta bala bukai.