Rh Banting dibantu perintah ngentak rumah panjai moden

SARIKEI: Peranak Rumah Banting ba Sare deka ngentak rumah panjai baru ke likun agi pengudah pengawa nyungkur taba rumah nya tembu ila.

Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka pengawa ngentak rumah panjai 11 pintu nya disadang berengkah dipejalai agi.

Penembu projek ngentak rumah panjai baru deka ngamatka juluk peranak Rumah Banting ti lama inginka rumah panjai baru kenyau ari setaun ke udah.

Ku Len Talif, rumah panjai baru nya lantang enggau nitih pelin rumah moden.

“Projek ngentak rumah panjai tu deka dipejalai chara beripai enggau penembu projek tu deka meri pengelantang ngagai 70 iku peranak dia.

“Perintah nengah Komiti Pengawa Berumah ngemendarka pinjau RM30,000 sepintu dikena ngemuntang projek tu tembu.

“Sida semina mayar RM100 sebulan enggau nadai bungai,” ku iya nerang ngagai pemberita pengudah ngabas taba projek nya, ditu kemari.