Rh Bundan, Metong nyau deka bebadi angus

SARATOK : Asil peneleba tauka penemu ke diulih ari nyereta kus Community Emergency Respon Team (CERT) 2017 ke diatur piak Bomba mujur nyeliah rumah panjai 19 pintu bilik ba Rumah Bundan, Metong ditu ari dituntung penusah angus lemai kemari.

Ketuai Balai Bomba enggau Penyah Penusah (BBP) Saratok,PPgB Nazry Mohamat madah penusah nyadi ba ruang bilik lumur dua rumah panjai nya kemega ari pansik tumu penusah nyadi ketegal ari api kelita ti tumbang sebedau api nyelamar kebukai.

Palan Balai Bomba Enggau Penyah Penusah Saratok nerima kangau ari peranak rumah panjai Metong urung pukul 7.10 minit lemai,sebedau datai ba palan penusah urung pukul 7.25 minit lemai.

Lebuh datai ba rumah panjai nya, api sigi udah mujur dirara menantu tuai rumah iya nya Mawat Sandah ngena siti kereban pengerara api rumah panjai nya empu.

Raban Bomba ari Balai Bomba enggau Penyah Penusah (BBP) Saratok ngambi awak pengelama 15 minit ngelawa rumah panjai nya.

Ungkup penerang,Tr.Bundan kala nyereta program ‘Summer Camp’ kediatur Balai Bomba Saratok ba taun 2017 lalu kereban dikena ngerara api ba penusah tu mega asil pemeri ari piak bomba maya program nya suba.

Sama datai ngesah mega iya nya sepenyampau tiga iku Staf polis ari Indu Opis Polis Saratok (IPD) enggau lima iku kaban bomba volunteer (PBS) ari Sungai Ruan iya siti ari rumah panjai besemak palan penusah tu nyadi.

LAMPU KELITA…Api dipelaba nyadi bepun ari lampu kelita tu.

Suara Sarawak