Rh Jelian enggau Rh Langi di Pasai Siong niri dampa endur ngenduh

SIBU: Peranak ti tasah angus ba Rumah Jelian Nayor enggau Rumah Langi Ambau di Pasai Siong diatu benung kiruh nirika dampa.
Adun Tamin, Ir Christopher Gira Sambang madahka dampa tu beguna amat endur sida ngenduh dulu sebedau ngentak rumah panjai baru.

“Diatu, sida ti tasah angus tu agi diau enggau rumah bala kaban belayan ke semak nya.

“Pengudah nyuaka bantu kereban nirika dampa, aku mesti nentuka bantu tu dikena nitihka pematut,” ku iya nerang, kilah ensanus.
Ku Gira, pengawa nirika dampa tu beduduk ari penusah rumah panjai ti angus sebedau tu ngujungka 37 ruang bilik lenyau endur ngenduh agi.

Terang iya, 37 ruang bilik nya mega udah nerima bantu kereban berumah chara berenggat ari iya.

“Diatu, pengawa nirika dampa nya benung dipejalaika peranak dia enggau chara beripai,” terang Gira.

Iya ngarapka bantu nya ulih ngelempungka tating penusah ditapi peranak ba dua buah rumah panjai nya.

Sebedau tu, iya udah nyuaka bantu kereban berumah dikena nirika dampa ungkup dua buah rumah panjai nya beungkus RM90,000.
Berebak enggau nya, Gira mega udah nyuaka belanja RM1,000 sepintu.

Kelimpah ari Gira, ketuai enggau Adun PRS mega udah nyuaka pemeri ngagai kededua rumah panjai tu baka Presiden PRS Tan Sri Datuk Amar James Masing penyampau RM10,000, Sapit Presiden PRS Datuk Joseph Salang Gandum (RM1,000) enggau Snowdan (RM8,000).

Sama bisi nyuaka pemeri iya nya Menteri Muda Pemansang Dagang Entarabansa enggau Industri, Terminal Industri enggau Pemansang Orang Dagang Datuk Malcom Mussen Lamoh (RM8,000), Adun Pelagus Wilson Nyabong Ijang (RM5,000), Kaban Parlimen Kanowit Datuk Aaron Ago Dagang (RM8,000), Adun Samalaju Majang Renggi (RM5,000) enggau Senator Rita Insol (RM5,000).

Pia mega, Adun Ngemah Alexander Vincent (RM5,000), Kaban Parlimen Hulu Rajang Datuk Wilson Ugak Kumbong (RM5,000), Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai (RM5,000) enggau Edwin (RM3,700) bela nyuaka pemeri sida.

Ke penerang semua, kena 19 Oktober tu tadi, dua blok rumah panjai nya, Rumah Jelian Nayor enggau Rumah Douglas Langi udah angus lengis urung pukul 1.45 lemai.

Tang nasip amat peranak ba dua buah rumah panjai nya nadai apa nama.

Suara Sarawak