Rh Nading udah disikap karan 24 jam

KAPIT: Sapit Kepala Menteri , Tan Sri Datuk Amar Dr James Jemut Masing udah mujur bejadika Projek Fasa 3 Sares ba Rumah Nading, Ulu Sungai Gaat ditu tadi.

Iya madahka perintah nengeri nengah iring GPS deka terus bebendar nyendiaka bekal kuasa karan 24 jam ngagai peranak rumah panjai ba menua pesisir ke apin bisi bekal kuasa karan.

“Ba taun 2025 ila ,dia selampur menua Sarawak deka ngasaika penyamai beduduk ari kuasa karan 24 jam ke ulih dikena kelebih agi ba menua pesisir.”

“Tu siti inisiatif ari perintah GPS bepelasarka projek ‘Community Based’ ke deka meri bekal kuasa karan ba selampur menua pesisir sereta menua ti udah bisi jalai alun deka disambung nengah grid besai enggau sekeda nengah alternatif Hybdrid enggau Sares baka solar,”ku iya.

Nangkan ke nya, Masing madahka tu ulih ngelempungka tating belanja peranak rumah panjai ba menua pesisir agi lebuh bebelika minyak diesel dikena ngidupka injin genset kelebih agi maya bisi pengerami enggau pengawa begunaka kuasa karan.

BEJADI…Masing ngetas riben kelai bejadika karan kuasa solar ba Rumah Nading seraya dikemataka Liwan Lagang (kiba) enggau Ugak Kumbong (kanan).

Nengah projek Sares tu mega diak peranak rumah panjai enda ibuh bebayarka bil karan enti dibanding ba mengeri besai enggau semina nyaga enggau manah perengka guna ke udah diberi.

Sepenyampau RM60,000 sepintu udah dikena ngaduka kuasa karan enggau RM1.7 juta udah diagih dikena ngaduka bekal kuasa karan nengah chara alternatif solar ke mungkur 28 buah ruang bilik ba Rumah Nading.

Sepuluh buah rumah panjai ba genturung Sungai Gaat iya nya Rumah Tungku, Rumah Nading, Rumah Sagen, Rumah Mamat, rumah Sait, Rumah Jaweng, Rumah Sugit, Rumah Kupa, Rumah Jegai deka terus bekenaka kuasa karan nengah projek Sares.

Tiap ruang bilik ke bekenaka kuasa karan solar deka nerima 2000 watt enggau 3000 watt bagi bilik tuai rumah.

Nangkan ke nya, Masing mega lalu bejadika penembu jelatung besi ke baru ba rumah panjai tu.

Sama bisi datai, Menteri Muda Eletrik Menua Pesisir, Datuk Liwan Lagang, Kaban Parlimen Hulu Rajang, Datuk Wilson Ugak , Pemesai Opis Pelilih Bukit Mabong, Douglas Pungga enggau ke bukai.

Suara Sarawak