Rh Naga enggau Rh Jackson, Rasau nerima tulung perintah

ENGKILILI: Perintah Sarawak udah nyuaka bantu penyampau RM144,200 ngagai 18 pintu Ketuai Bilik (KIR) nitihka syarat ti udah ditetapka Opis Pengintu Pengelantang Komuniti Sarawak (JKMS).

Bantu nya udah disuaka Menteri Muda Pengintu Pengelantang Komuniti, Datuk Francis Harden Hollis ngagai peranak ti tasah angus ba Rumah Naga enggau Rumah Jackson Atit, Kampung Rasau, Engkilili ba Balai Raya rumah panjai nya.

Pia mega, Harden nyuaka bantu nya nengah Opis Pengintu Pengelantang Komuniti, ngarika Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit (KWKPK), Datuk Seri Fatimah Abdullah.

Dulu ari nya, bisi 18 pintu semina tinggal gari ba punggung ketegal penusah rumah panjai angus kena 16 September tu tadi.

Sebedau tu, RM3,050 udah disedia ungkup bantu pemakai pengudah penusah angus tu nyadi.

“RM30,100 udah dikena nyendiaka bantu pemakai lebuh sida ti tasah angus dipindah ngagai dampa pengelama dua minggu.

“Semua bantu berengkah ari sida dipindah nya, penyampau RM177,350,” terang Harden.

Nambahka nya, Harden ngarapa bantu ari perintah nya dikearap ulih ngelempung tating penusah maya sida ngentak rumah baru.

Ba lansa sama, Harden madahka semua bantu nya datai ari Perintah Sarawak ti dikemendar Kepala Menteri Datuk Patinggi Abang Johari Tun Abang Openg.

Ku iya, bantu tu ngauanka penyiru Abang Johari ngagihka belanja mantu rayat ti tasah angus nengah KWKPK.

“Penyiru perintah betatika pengelantang rayat ukai naka nya aja tang bemacham insentif bantu bukai deka diberi enti rayat nganjung peminta.

“Nya alai, aku ngarapka rayat seati enggau seruran bekerejasama nyaga pengelantang komuniti ngambi peminta sida muntang enggau lanchar dipejalai,” ku Harden nyemetak madah.

Sama datai Sekretari Politik Kepala Menteri, Daniel Bujal, Pemesai Pengereja Pengawa Opis Pelilih Mit Engkilili, Brin Munsang, Pemesai Pengintu Pengelantang Komuniti Bagi Menua Sri Aman, Vivian Engkiong sereta Penghulu Bong Nyuk Fah.