BETONG: Peranak Rumah Sibat, Penurin ditu dilalau terus nyaga pemeresi sereta ngasika Atur Standard Pengawa (SOP) ti udah ditetapka perintah sekumbang timpuh Atur Mindah Dipekul (PKPD) tu.
Tuai Rumah (TR) Sibat anak Banyan,58, terus meransang sida serumah bela besabar napi PKPD kedua ti berengkah 2 nyentuk 15 September tu.
“Tu kedua kali kami di Penurin ditu diasuh bepekul bekau ari penyadi Kluster Penurin apin lama.
“Nya alai, penguji serak tu pemadu berat diasaika kami serumah laban nyau berunggu kena PKPD.
“Ukai deka nyalahka sapa-sapa tang semina ngenang pemedis enggau pemar ditapi lebuh diasuh bepekul taja kitai bela nemu pemedis ke datai nya endang enda disadang.
“Arapka, anang ngambi mudah pasal pengerai lalu sama bela besampi minta saup Petara jampat munaska pengerekai Covid 19 tu,”ku iya nerang ngagai Ruai,Suara Sarawak kemari.
Berebak enggau nya, Tr Sibat meri terima kasih ngagai bantu barang pemakai ti diberi pengari Adun Layar, JKM Betong,Opis Residen Betong enggau Gerempung Ukai Perintah (NGO) nyadika bekal sida serumah sekumbang PKPD kedua.
“Semina Petara aja ulih malas pemanah enggau penyiru semua kita ke udah nganjung bantu.
“Nengah bantu tu ulih nyeliahka kami serumah ari pungkang pemakai,”ku iya.
Nangkan ke nya, Sibat madah diri sinu ngenang buah lada majak mansau nadai digumpul, pia mega rega getah majak manah tang enda ulih nurun nangkal.
Nya alai, ku Sibat penanggul tu balat bendar ngeruga penatai pemisi peranak rumah panjai seraya madah orang luar agi mengkang ditagang tama ke rumah panjai sida.
Rumah Sibat di Penurin ti bisi 49 pintu, sida serumah diasuh bepekul bekau ari bisi kaul semak enggau Kluster Kilometer 20 (KM 20) ba Simpang Layar ditu.
