Rikod belanja Sarawak pemadu manah

“Aku ukai semina bejaku aja tang endang bisi Rikod Besai Audit madah ka atur belanja menua kitai (Sarawak) pemadu manah.”

KUCHING: Sarawak sebuah nengeri ti ngempu rikod atur belanja pemadu manah kenyau berapa taun ti udah.
Sapit Kepala Menteri Datuk Amar Haji Awang Tengah Ali Hasan madah iya ukai nempa jaku bula tang rikod tu nyemetak dipadah ba Rikod Besai Audit (General Audit Report).

“Nengeri Sarawak ngempu rikod atur belanja paling manah kenyau berapa taun ti udah lalu.

“Aku ukai semina bejaku aja tang endang bisi Rikod Besai Audit madah ka atur belanja menua kitai (Sarawak) pemadu manah,” ku iya.

Awang Tengah munyi nya lebuh ditanya pemberita ba Pengerami Badudun Aidilfitri Dangsanak Limbang ba Palan Konvensyen Penview Kuching (PCCK) ditu, kemari.

NAMA BERITA? Sapit Kepala Menteri Datuk Amar Haji Awang Tengah Ali Hasan (tengah) betabi enggau temuai ti bisi ngulu pengerami nya.

Iya madah jaku Menteri Wang Malaysia Lim Guan Eng (LGE) ti madahka Sarawak deka bankrap dalam kandang tiga taun deka datai semina enggau tuju politik aja.

“Kitai orang Sarawak ukai budu. Sida semina deka nunjukka sida lebih manah ari kitai dalam ngatur ekonomi menua.

“Nyadi diatu kitai meda baka ni sida ulih ngatur ekonomi Malaysia. Rayat Sarawak meseti beratika enggau manah ulah sida.

“Kitai enggai digaga nyadi perengka politik sida aja,” ku iya.

Apin Lama LGE ba sebuah Pengerami Makai Lemai Pengasih DAP madah Sarawak deka bankrap dalam kandang tiga taun enti agi dipegai Gabungan Parti Sarawak (GPS).

Pekara nya mayuh ngemediska ati rayat Sarawak nyengkaum Kepala Menteri Sarawak Datuk Patinggi Abang Johari Tun Openg ti ngumbai LGE semina bejaku baka nya enggau tuju politik.

Suara Sarawak