Rikod wang S’wak pemadu manah

KUCHING: Sarawak ngerikod penuduk wang pemadu manah ari sekeda ejensi ngaku entarabansa ti ngayanka penau Perintah Sarawak ngatur menua.

Sapit Kepala Menteri ti nyadi Menteri Industri enggau Pemansang Pengawa Dagang enggau Menteri Pemansang Mengeri Enggau Pengeraja Asal Kedua Datuk Amar Awang Tengah Ali Hasan madah, Sarawak udah ngerikod penuduk pemadu manah ari sekeda ejensi baka Moody’s enggau Standard And Poor.

“Sarawak mega diaku ngembuan rikod wang pemadu manah dalam ripot ari Opis Audit Menua.

“Ngatur pekara wang tu nyadi siti ari penau nyata orang kitai ngaduka menua tu,” ku iya.

Pia mega ku iya, Sarawak sebuah nengeri ukai semina besai aja, tang kaya enggau pemansut asal lalu semina rayat Sarawak aja patut ngadu enggau nentuka nasit menua tu.

NUTUP GAWAI… Awang Tengah disempulang Jeneral Datuk Stephen Mundaw enggau bala bukai dipebasa ngiling bidai atas panggau.

Iya mansutka jaku tu lebuh bejadika Pengerami Ngintu Gawai Raya Opis Menteri Pemansang Mengeri Enggau Pengeraja Asal ba sebuah hotel tebilang ditu malam kemari.

“Dawa ngumbai perintah nengeri deka bangkrap kandang tiga taun deka datai semina jaku tempa politik ti nadai bebatang, kelebih agi jaku tu disebut orang ari luar ti enda nemu atur pengawa nengeri Sarawak.

“Kitai patut seruran meri sukung ngagai bala ketuai perintah menua diatu di baruh iring Kepala Menteri Datuk Pantinggi Abang Johari Tun Abang Openg ti endang peranak asal menua tu enggau atur pengawa ti nyulut sereta diaku raban ari menua tu empu enggau menua luar,” ku iya.

Berebak enggau nya, pengawa nyuaka setipikit ngagai penerima Anugerah Servis Nyulut enggau tepa ngagai pemesai ti pinchin gawa sereta pemesai mindah gawa ngagai endur bukai.

Pengerami mega richah enggau pengawa nutup Gawai Dayak denengah pengawa Ngiling Bidai dipujurka Datuk Amar Awang Tengah Ali Hasan.

Sama datai Menteri Muda Perambu Mengeri, Pengatur Tanah enggau Rampa Menua Datuk Len Talif Salleh, Sekretari Mendam Opis Menteri Pemansang Mengeri Enggau Pengeraja Asal Datuk Dr Wan Lizozman Wan Omar, Pemesai Pengatur Pengawa Khas Jeneral Datuk Stephen Mundaw.