RINDU nupi sereta meda chura bulu manuk sabung nyadika siti chara kena ngisi awak lepa lebih agi maya ujung minggu.
Valentine, 29 asal ari Sibu enggau madi biak iya Valenterry, 28 madahka bepun ari pengerindu nupi manuk sabung enda nyangka pengawa tu ulih nyadi siti ari chara ngulihka penatai pemisi tambah ngagai ruang bilik sida.
Ketegal sama ngembuan ati taluk bayam manuk, semua pengawa bepun ari meli baja pemakai enggau masu pemeresi rumah manuk endang digaga seduai semenyadi nengah chara bekerejasama.
Ngelansa bekaul pengawa nupi mayuh macham bansa manuk ti baru, urung 25 iku indu manuk sereta enggau anak manuk ditupi iya ba rumah sida empu ba sitak Sibu ditu.
Bepun ari taun 2016, seduai iya tu nguji bejual anak manuk sabung ti udah manggai umur entara enam nyentuk tujuh bulan enggau rega urung RM450 nyentuk RM500 siku.
Nambahka nya ku iya, sekeda ari bansa manuk sabung ti ditemu iya nya Biring, Labang, Jelayan, Bangkut, Engkecung enggau Burik.
BETANYA BA ORANG TUAI
Laban ngasai diri agi baru ba pengawa dagang tu, Valentine madah maya keterubah iya nguji nupi manuk sabung suba, iya suah nanya ba apai enggau aki iya bekaul chara ngintu manuk sabung awakka gayu sereta chara ngelala kelai bansa bulu manuk sabung.
“Laban ke enda berapa landik nyabung, nya alai aku semina rindu ninga ke cherita orang bukai nyengkaum bala pemeli bekaul chara sida ngansah penajam mata taji kena ngandalka pengering manuk,” ku iya.
Lebuh ditanya, Valentine madahka naka diatu sida nadai nerima sebarang bantu tauka skim ari perintah lalu semua ungkus belanja endang penuh bepanggai ba sida empu aja.
“Setengah ari penyampau untung bejual manuk sigi diungkup pulai ngagai modal kena meli barang pemakai manuk aja sebedau dibagi kami dua menyadi ke sama enggau ngintu sereta meresi sangkar manuk,” ku iya.
Taja pia, iya mega nandu enda bekira enggau rega sum sereta penyampau untung ti dibulih ari asil bejual manuk sabung tu.
“Aku ngembuan siti inkubator diatu kena nyadi sarang endur ngengkahka telu manuk ti deka diperam lalu mechah nyadi anak manuk sepengudah sebulan.
BELAJAR ARI MEDIA RAMA
“Semina belajar ari media rama baka Facebook enggau YouTube, aku nguji deka ngena sistem inkubator awakka proses telu nya tadi mechah nyadi anak manuk ulih diperumban agi awakka pemeli enda lama nganti.
“Inkubator ti digaga kami tu beringkat baka pemesai siti kutak lalu lampu ngena darjah Celcius ti baruh dikena mancharka pengangat awakka proses meram telu dataika telu mechah nya ulih nyadi,” ku iya lebuh ditanya bekaul pengelama pemeli nganti manuk ti udah chukup bulan kena dijual.
Ku Valentine, siti inkubator nya ulih nyimpan urung 30 iti telu manuk biak ti diperam dalam timpuh urung 21 hari lebih kena nentuka telu nya amat udah mechah.
Lebuh ditanya bekaul bansa manuk sabung ti suah agi digiga orang ti rinduka pengawa nyabung, iya madahka nya bepanggai ba orang nya empu. Tang ke suah agi digiga iya nya manuk bulu Burik, Menaning enggau Bangkut.
“Naka ke diatu, enda semina ba sitak Sibu enggau Sibu Jaya aja ke suah meli manuk sabung kena ambi ke purih tauka dikena nyabung.
“Pemeli ti datai ari menua Kapit, Song, Kuching enggau Belawai mega suah agi meri sukung meli manuk ditupi iya sepengelama tu.
“Enda semina rindu nupi manuk sabung, aku mega ngembuan penyiru nupi mayuh macham jelu tupi ti bukai baka itit enggau ikan ti dibulih ari asil nyala ba sungai Nanga Pakoh. Barang sapa bisi ati deka betanya silik senentang penemu nupi manuk tauka deka meli purih manuk sabung tau telefon nuju lumur 013-8368863,” ku iya.
