Rintai nama 50 pemekit udah dibantai

SARATOK: Pemutus rintai nama 50 iku pemekit pemadu mayuh undi ungkup Pekit Kumang Gawai Online 2021 Trofi YB Datuk Ali Biju udah dibantai ba laman Facebook rasmi Ali Biju empu, ngalihari tadi.

Tiga pemekit nerima undi (like) pemadu mayuh entara 50 iku ke dipilih masuk renggat kedua tu iya nya Serena Anak Tony ari Kapit enggau 40,779 undi.

Udah nya pemekit ari Kuching benama Josephine Jelawat Anak James Jimmy ti nerima 12,030 undi ditangkan Jessica Awing Ureng ari Baram bulih 10,039 undi.

Tuai Koordinator Pekit, Seman Endoi madahka bala komiti meri besai pengaga ati ngagai semua bala pemekit kumang ti udah mujur masuk top 50.

Baka udah dipadah sebedau tu ku iya, bala pemekit dipinta ngambi video bejalai tauka Catwalk enda kurang ari 30 sikin lalu enda tau lebih ari seminit.

SERENA ANAK TONY… Pemekit ari Kapit enggau 40,779 undi

“Dalam video nya ila, bala pemekit enda tau enda madahka nama diri enggau asal penatai lalu mesti ngerasukka Ngepan Iban.

“Udah nya, video kita diambi dalam format MP4 – Vertical (Potrait) lalu dianjung nengah Google Form ke alai link pom tu diberi ngagai pemekit ti udah dipilih masuk Top 50,” terang iya.

Seman madah baru, video nya mega nitihka kreativiti bala pemekit empu lalu diundi bala mensia mayuh (juri awam) nengah online, masuk Top 10, iya nya renggat kepenudi pekit.

Ngena peluang nya, bala komiti ngarapka bala pemekit bela ransing ati nyingkang ngagai renggat kepenudi pekit lalu anang lemi semengat tauka mantul ngapa.

“Bepekit meh dalam pengerindu enggau pemaik ngambi rambai jaku pekit kitai tu Besaup Mekuhka Adat Enggau Main Asal Dalam Arus Pemansang ulih dijapai.

“Nya alai undi mensia mayuh deka dibuka baru nandaka pengawa kitai ba renggat kedua deka belabuh enda lama agi,” ku iya.

Berita penuh Ruai 8 pagila

JESSICA AWING URENG… ari Baram enggau 10,039 undi.

 

JOSEPHINE JELAWAT ANAK JAMES JIMMY… Ari Kuching enggau 12,030 undi

 

KABAN KOMITI PEKIT… (ari kiba) Leslley Kalom Brain (koordinator), Seman Endoi enggau Zecharia Jana Chendang (Juru Teknikal).

Suara Sarawak