NGIRI penemu ngagai bala bukai lebih agi raban indu tu dikena kitai ngidupka baru ngepan tauka pekayan burie, ku Riong Gimang ngepunka randau.

Riong ke mega dikangau nyadi siku ari pengajar kus ngaga kain burie madah, pekayan burie tu endang udah bisi kenyau ari kelia tang diatu nyau majak tenggelam dibai arus pemansang dunya.

“Nya kebuah, program ke diatur pengelama sehari tu endang chukup manah dikena kitai ngayanka baru pengelain kain burie tu ngena chara baru tang agi ngena kerubung tekuyung.

“Aku mega chukup temegah sereta gaga ati ulih bedua penemu ngagai bala penyereta lebih agi raban indu.

“Nyadi, aku tu udah dikangau Palan Penyulut Latih enggau Teknikal (Centexs) nyadi siku ari pengajar ungkus pengawa ngaga kain burie lalu program tu endang dipelanja sida.

“Terubah sida Centexs ngangau nyadi siku ari pengajar kus ngaga kain burie ungkup Community Technical Outreach Program (CTop) lebuh nya, gagit endar ati deka bekunsi penemu ngagai bala bukai lebih agi di menua Jungkal Layar, Betong.

“Ni naka penemu diri mih ukai ga ngumbai diri pandai tang dia bisi penemu sigi dikunsi magang.

“Kebuah pia laban nadai salah bekunsi penemu dikembuan diri ngambi nyaup bala bukai kelebih agi raban indu ngemansangka diri ba dunya moden diatu.

“Program baka diatur Centexs tu manah endar dikena ngiri enggau ngansah penemu bala bukai seraya ngerandang jalai awakka sida ulih nambahka penatai pemisi.

“Kebendar, program sehari nya mayuh bagi lalu baka enggi aku tadi, ngambi bagi ngajar kus ngaga kain burie,” terang Riong.

NGERANDANG JALAI

Riong madahka tuju program ke diatur pengelama sehari nya dikena ngerembaika agi penemu pasal pengelandik jari ngagai raban indu ba menua Jungkal Layar, Betong tu.

Ku Riong, iya udah ngajar 15 iku penyereta ke bisi masuk ngagai program sehari nya.

Pia mega ku iya, program tu mega bisi ngambi bala indu ke minat ba pengawa tu ke semak menua nya.

“Timbal ari semua penyereta chukup manah, sida bela madahka kus ngaga kain burie tu manah endar laban ulih dikena nambahka penemu diri empu.

“Ari perati aku lebuh ngajar ba kus nya, semua sida bebendar lalu enda masau peluang deka belajar ari pun nyait kain burie dataika udah tembu.

“Sehari asai enda umbas ngajar bala sida laban rindu endar meda timbal sida ke puh belajar, sida endang nguna manah peluang ba program tu tadi.

“Tu mih chara raban indu ngemansangka diri laban penemu enggau pengelandik ba krafjari tu beguna endar jam diatu.

“Tambah mega, diatu nyau muntang agi enggau pengelebih dagang digital ke alai kitai ulih ngayanka produk krafjari nya ba media rama sebarang maya baka di Facebook, Facebook Pages, Instagram enggau ke bukai,” terang Riong.

Nambahka nya, Riong mega madahka program baka tu nyadi pelasar ngambi bala penyereta ulih muka runding senentang kus baka tu ukai semina nyadi endur sida belajar tang pengelandik dikembuan sida nya chukup diguna ba pengawa dagang.

Ku iya, produk krafjari tu entara produk ke chukup dikerindu sereta laku ukai semina ba makit menua tu empu tang tau rembus ngagai makit entarabansa.

Nya kebuah ku iya, mayuh pedagang indu ke ngaul diri ba pengawa ngelakuka produk krafjari udah beberita nama laban produk sida udah rembus ngagai makit entarabansa.

BEDUA PENEMU

Ba lansa sama, Riong madahka ba program nya iya udah ngajar bemacham chara ngagai raban indu ari pun dataika udah tembu nyadi kain burie.

“Terubah, aku nerang ngagai sida sentang nama kereban diguna dikena ngaga kain burie tu.

“Udah nya tadi, aku ngajar sida chara melit kain nya ba punggung enggau chara ngena kain burie nya, udah nya baru aku nerang baka ni chara ngaga ukir ba kain nya.

“Tembu nya baru aku ngajar sida baka ni nyait burie ba kain ke udah diukir tadi, nyadi aku ngajar sida dua chara.

“Kesatu, ngena gam udah nya baru nyait tauka terus jait tang mesti dijait ngambi tekuyung nya lekat manah lalu enda mudah keberai labuh.

“Rindu meda pengelanchat sida nunda utai ke dipadah aku laban mua sida tampak gagit belajarka pengawa ngaga kain burie tu.

“Aku pen nyau besemangat ga ngajar laban meda pemanah timbal ari sida ke semampai betanya nyema bisi utai ke enda ditemu.

“Baka aku suba, belajar ba bakih aku benama Sandin Benedict, tudah mih endur aku betanya sereta belajar.

“Diatu, masuk empat taun aku ba pengawa begagaka kain burie tu lalu suah dikangau bekunsika penemu ngagai bala bukai lebih agi raban indu.

“Sigi baka baru belajar, bisi aja pengilap tang enti deka landik mesti puh belajar lalu anang mantul ngapa.

“Lebuh ke ngajar sida, aku mega bisi nerangka pemesai guna belajarka pengelandik jari kemaya hari tu,” ku Riong tuchum lebuh ngenang pasal program sehari nya.

NGEMBING KOMUNITI

Nangkan nya, Riong mega muji inisiatif diatur Centexs dikena nambahka penemu bala bukai lebih agi pasal pekara digital.

Iya madah baru, Centexs Betong bisi ngatur dua bengkah program, kesatu nya program timpuh panjai pengelama enam ngagai 15 bulan lalu kedua nya program sehari tauka dua hari.

Iya mega madahka program tu bepanggai ngagai peminta bala komuniti.

“Kelimpah ari kus ngaga kain burie, bemacham kus disediaka Centexs Betong baka Kus Fertigasyen, Kus Ngaga Kuie, Kus Ngaga Mi Kuning, Nanam Kulat Tiram.

“Kus Bejait, Kus Belajar Ngaduka Karan, Kus Ngaga Sugu Tinggi, Kus Nguntin Buk enggau Kus Nganta mega bisi diatur.

“Bisi mega Kus Ngaga Sum Organik, Kus Aplikasyen Mobile, Kus Ngena Internet Tools, Kus Ladang, Kus Ngaga Keringkam, Kus Ngaga Kek, Kus Ngubah Bungai, Kus Aplikasyen Excel, Kus Ngaga Resume, Kus Nusuk Manik Loom enggau ke bukai.

“Sama seretai enggau aku ngajar bala bukai ngaga kain burie, bisi mega tiga kus bukai diatur baka kus ngaga kuie, kus hidroponik enggau betusukka manik loom,” terang iya baru.

GUNA PENGELANDIK DIRI

Riong mega madah, program baka tu dikena meransang bala bukai sentang pemesai guna nambahka penemu enggau pengelandik diri.

Ku iya, pengelandik dikembuan siku-siku mensia tu dikena nyikap enggau ngemansangka diri dudi hari setipak enggau pemansang dunya moden.

ku Riong, jeman diatu pengelandik baka pengelandik jari tu beguna endar nentuka kitai enda tinggal ari arus pemansang dunya lebih agi mesti nyikap diri enggau penemu teknologi pemadah.

“Mensia mayuh kelebih agi raban indu ukai semina mesti landik ba tunjuk jari tang mesti nambahka penemu diri bekaul dunya digital nipakka pemansang dunya moden nentuka dagang kitai beretan belama.

“Dagang digital nya meri pangka besai ngagai bala pedagang lebih agi maya pengerekai Covid-19 tu laban nengah media rama nya mih kitai ngayanka produk diri ngambi ditemu penguna sebelah Facebook, Instagram enggau ke bukai.

“Laban ari bisi penemu enggau pengelandik ti bukai, kitai deka ngayanka penyelai dibanding orang bukai sereta nambahka belanja, ambika banding baka ngaga kain burie tu, tua ulih nyual iya seraya ngisi awak lepa.

“Tambah mega, pengelandik jari tu tau dikena nambahka penatai pemisi kitai empu.

“Baka ba rumah panjai, mayuh raban indu semina bekebun enggau bumai aja lalu nya kebuah kitai mesti bisi penemu enggau pengelandik tambah ke bukai mega.

“Nya alai, aku chukup gaga ulih bekunsika penemu ngambi penemu enda puntan tauka lenyau baka nya aja, bisi dikembuan lalu ulih mega dikerembai ngagai rebak dudi,” ku Riong nyimpul randau.