Riot sedia ngetanka menalan

SERIAN: Kaban Parlimen Serian, Datuk Seri Richard Riot Jaem sedia ngetanka penuduk iya enti sema parlimen dipadam.

Riot madahka diri sedia bediri minta pilih lalu ngetanka penuduk ti dimenang iya kenyau ari taun 1990 suba.

Iya nyemetak madahka diri udah nyikap diri ngetanka menalan nya laban agi regas enggau bepengerai nampung pangku pengawa gawaka rayat dia.

“Enti aku agi diguna rayat gawaka sida, nadai salah endur aku bediri minta pilih baru. Enti nyau udah enda diguna rayat, nadai ku enggau ga.

“Kitai udah datai ba mua jematan, sekalika deka ngelayang tauka enda aja. Kitai meda dulu baka ni,” ku iya.

Riot mansutka penemu baka nya ngagai raban pemberita lebuh ditanya pasal Pengawa Bepilih Besai (PRU) nyangka deka diatur ngenyit.

Dulu ari nya, iya udah dipebasa bejadika Jalai Chung Hua ditu, tadi.

Suara Sarawak