HSL berbuka puasa bersama pengamal media di Sarawak.

RM1.22 bilion agih belanja udah dikemendar Komiti Sada

Facebook
Twitter
WhatsApp
Telegram
Email
Chairperson Sada, Datuk Seri Hajah Rohani Karim (tengah) bejaku ba Aum Komiti Pemandu Sada ke-2.
Chairperson Sada, Datuk Seri Hajah Rohani Karim (tengah) bejaku ba Aum Komiti Pemandu Sada ke-2.

SIMANGGANG: Sepenyampau RM1.22 bilion agih belanja udah dikemendarka Komiti Pemandu Ejensi Pemansang Sri Aman (Sada) ungkup 52 bengkah projek pemansang menua tu.

Chairperson SADA ke mega Kaban Parlimen Batang Lupar, Datuk Seri Hajah Rohani Karim mansutka pekara tu ba Aum Komiti Pemandu SADA ti ke-2 ba Wisma SADA kilah ensana.

Ku Rohani, agih belanja projek tu dikemendarka pengudah belematika atur nama enggau chabang pakej projek nya nyengkaum projek ngemanahka infrastruktur baka jalai alun, jematan sereta parit enggau entail ai, projek betanam betupi, projek dagang temuai sereta projek sosial.

“Semua projek tu apin dipejalaika sereta benung dalam proses dokumentasyen enggau langgur ngaga pelin projek nya.

“Ari penyampau nya, lima bengkah projek deka berengkah dipejalaika ba taun 2022 tu lalu projek ke bukai nya deka dipejalaika berenggat ba taun 2023 enggau 2024.

“Lima bengkah projek ke deka diatur dalam taun tu nyengkaum projek ngaga jematan Sungai Undop, Rumah Kedeney, Kampung Beleti enggau projek mitigasyen bah ba kandang endur Kejamut.

“Pia mega, projek ngaga pengkalan perau panjai ba Rumah Rantau Kemayau Manis, Lubok Antu, projek ngemanahka pengkalan ba Ulu Menyang, Lubok Antu sereta projek ngemanahka Palan Ngelatih Penau Sarawak, Sri Aman,” ku padah Rohani.

Rohani mega madahka ba Aum Komiti Pemandu Sada dulu agi ari nya, komiti nya udah ngemendarka Projek Pengawa Nyaga Tebing Sungai Batang Lupar ke nyampau RM60 juta.

Ku iya, penerang ari Opis Parit enggau Entali Ai (DID) Sri Aman madahka projek nya nyengkaum pengawa nyaga tanah ba tebing Sungai Jambu nyentukka Tanjung Engkabang lalu deka berengkah dipejalaika ba suku ke-3 2023 ila.

“Komiti Pemandu Sada mega meri agih belanja tambah kena ngemadaska agi Kampus PPKS Pelilih Sri Aman nengah pengawa nyendiaka perengka guna enggau pemudah ba buding kampus nya ke pengelantang nembiak ke diau dia.

“Projek tu endang sebengkah projek kena ngemansangka modal mensia pelilih Sri Aman sereta nyadi projek keterubah diatur raban Sada,” ku Rohani.

Ba aum tu, Rohani meri besai terima kasih ngagai ex-Residen Pelilih Sri Aman, Datuk Indit Bangai ke udah pinchin ba tengan bulan June sereta ngelaluka penatai Residen Pelilih Sri Aman ke baru, Sirai anak Daha.

Rohani mega meri terima kasih ngagai bala tuai opis perintah ke pindah gawa ba endur bukai sereta ngelaluka penatai bala tuai opis perintah ke baru berengkah gawa ba pelilih Sri Aman.

e-Akhbar Suara Sarawak

Berita Berkaitan

E-Paper

31 Mac 2023

Berita Terbaru