KUCHING: Bisi 228 projek deka dipejalai baruh Ejensi Pemansang Penyeraris Greater Kuching (GKCDA) ngena agih belanja RM1.5 bilion.
Ku Tuai Pegawai Eksekutif GKCDA, Datuk Ik Pahon Joyik, 228 projek nya ba renggat kereja keterubah taun tu lalu tebal agi projek nya meri perati ngagai pengawa nyeleti infrastruktur enggau fasiliti bukai ba sitak Greater Kuching.
“Ngena agih belanja nya, kami meri perati ngagai projek infrastruktur baka jalai besai ba kandang genturung pendiau enggau endur bukai.
“Tu nyadi ba ninting sitak DUN baruh Greater Kuching lalu sida engka beguna ke langkar tengkebang khas jalai nitih ke sitak diri empu,” ku iya.
Ik Pahon bejaku munyi nya lebuh dirandau Suara Sarawak ba Awah Cafe Gerempung Nasional Dayak Bidayuh (DBNA) ditu, ensanus.
Ik Pahon mega madah, ari penyampau agih belanja nya, ungkus urung RM1.428 bilion deka dikena bejalaika 228 projek lalu laluh RM72 juta nyadi agih belanja rizab.
Ku iya, nya taga penyampau agih belanja ti deka dikena nitih ke langgur projek pemansang ADUN ba genap sitak.
“Enti semua projek nya meraka sitak bukai, agih belanja deka diungkup dikena ngelanchar pengawa bejalai projek nya.
“Ambi ke chunto, bekal ai nengah sitak Opar enggau Tanjung Datu ti meraka sitak DUN.
“Enti projek nya nengah sitak tu, ungkus engka bebida ba sitak bukai.
“Nyadi kitai ngira laluh iya baka rizab, dikena napi sebarang pekara ti engka bisi nyadi,” terang iya.
Ku Ik Pahon agi, GKCDA deka ngagih belanja RM1.5 bilion ba timpuh tiga taun ungkup projek pemansang.
Taja pia, iya mega madahka pasal penusah enggau penekul bukai ba pengawa bejalaika projek ba sitak Greater Kuching.
“Aku andal kitai ulih melanja duit nya enggau manah ba timpuh tiga taun sebedau nerima baru agih belanja ari perintah.
“Tang udah tentu, kami deka napi mayuh penguji ba pengawa nya, kelebih agi pasal isu tanah enggau penanggul teknikal bukai.
“Kami deka nguji mutarka penanggul nya enggau chara pintar,” terang iya.
