RM1 juta ungkup veteran ATM

KUCHING: Gerempung Veteren Soldadu Malaysia (ATM) nerima geran RM1 juta dikena bejalaika pengawa di menua tu.

Sapit Kepala Menteri ti mega Menteri Wang Kedua Datuk Amar Douglas Uggah Embas madah geran tu dikena ngenang jasa bala vateren ATM ti begadai nyawa maya agi gawa menya.

“Diatu kitai ngasaika pengelantang enggau pemujur asil ari pengawa sida nyaga pengelikun menua.

“Sarawak deka meruan ingat sereta ngenang jasa ti digaga sida dalam nyaga pengelikun menua tu,” ku iya.

Uggah bejaku munyi nya ba Pengerami Makai Lemai Gerempung Veteren ATM sebedau aum besai ti ke-62 ditu, malam ensana.

Datuk Amar Douglas Uggah Embas (tiga kiba) ngelekatka midul ngagai siku penerima.

Iya mega madahka, gerempung nya tau mantaika nama-nama penanggul tauka isu ti ditapi sida ngagai perintah.

Dalam nambahka penatai pemisi kemaya hari, Uggah ti mega Menteri Betanam Betupi, Tanah Adat enggau Pemansang Kandang Menua ngasuh bala sida sama ngaul diri enggau pengawa betanam betupi moden.

“Menua kitai, dalam atur ngaga pengawa betanam betupi ngagai moden ti tau meri penatai pemisi.

“Kepala Menteri Datuk Patinggi Abang Johari Tun Openg deka meda Sarawak mansang nanam mayuh buah, sayur enggau mansutka produk dagin lalu nyadi menua tibang eksport ba taun 2030.

“Mayuh program udah dilanggur dalam nyapai tuju tu,” ku iya.

Iya mega, ngasuh raban gerempung nya ngelawa pengawa Stesyen Betanam Betupi Rampangi ngambi penemu enggau penau.

Kelimpah ari nya, iya mega madahka opis menteri iya endang seruran deka bekerjasama dalam ngatur mayuh program pasal betanam betupi, tang anang semina bepanggai ba perintah aja.

Tandu Uggah, sida endang terus bekaul rat dikena mantu rayat ngelaban pemansang sereta nyeliahka penanggul baka isu pengarap enggau bansa ti suah nyadi diatu.

Pengudah bejaku dia iya nyuaka ‘Pingat Sentiasa Berjuang’ ngagai 10 iku penerima.