RM100 juta ungkup JKKK

KUCHING: Perintah Sarawak nyendiaka penyampau RM100 juta ungkup Komiti Pemansang enggau Pengelikun Genturung Pendiau (JKKK) ba taun baru.

Kepala Menteri ti mega Menteri Wang Pengatur Ekonomi Datuk Patinggi Abang Johari Tun Openg madahka pekara tu lebuh mantaika Bajet Sarawak 2020 maya Aum Kedua Renggat Keempat Dun Ke-18 ditu, kemari.

“Dikena negapka pengereja pengawa JKKK, kami meri basa ke tanggungpengawa besai sida ti nyadi jematan dalam mantu nyaga pengelikun enggau pengelantang pendiau kampung.

“Tu nyadi basa besai nuju sida dalam nyaga penyerakup ba pupu bansa kelebih agi enggau tikas pemansang ti majak tinggi ti meri empas ngagai tanggungpengawa sida ti lebih majak mar,” ku iya.

Tandu iya, komiti JKKK dikeandal deka majak bepenau enggau proaktif nengah agih belanja ti diberi taun baru tu ila.

“Nya alai, perintah nyendiaka RM100 juta ba taun 2020 ngagai JKKK awakka sida muntang ngatur aktiviti sereta program.

“Tu mega nyegkaum mayar elaun baum enggau elaun ninting bulan ngagai chairman enggau sekretari JKKK,” ku iya.