RM100,000 bantu berumah baru

ENGKILILI: Kaban Parlimen Lubok Antu Jugah Muyang bisi ngatur pejalai ngabas seraya nganjung bantu penyampau RM100,000 ngagai Rumah Lepang Gerang, Lepan Sayat Bukong di Engkilili, ensana.

Bantu disua Jugah nya dikena besaup mantu rumah panjai 26 pintu bilik ti diuwan 167 peranak ngentak rumah baru.

Jugah datai ba taba rumah panjai disempulang bala kaban ari Palan Servis Rayat Parlimen Lubok Antu.

Sida buat mega ngena awak nya berandau seraya meda empu gaya pendiau endur sida ti tasah ngenduh dulu kenyau ari seminggu ke udah.

“Kitai ngarapka sida ditu liat ati napi penguji besai tu lalu aku besemaya naka ulih nyaup nama utai ti patut.

NGABAS… Jugah lebuh ngabas ensarau sida ti tasah seraya nganti ngentak rumah baru.

“Tu nyengkaum meri enggau nyendiaka kereban dikena gaga alai ngenduh dulu tauka nirika dampa ti meruan enggau lantang agi endur diau.

“Kitai enggai ngelengka enggau nejuka rayat ti ditinggang penusah baka tu,” ku iya.

Berebak enggau nya, Jugah meri terima kasih ngagai semua ti udah besaup ngelempungka tating penusah sida Lepang serumah.

“Terima kasih besai ngagai raban ari ejensi korporat, gempung ukai dikuasa perintah (NGO) enggau sida ti ngatika diri ti udah kiruh bepupu enggau ngelimpangka awak diri nganjung bantu kitu.

“Saup kita tu ngemai reti besai ngagai sida ti tasah lalu tu nyadika peransang ngagai sida enda mantul ati napi penusah,” ku iya madah nyemetak.

Tambah mega ku iya, nadai ngira bansa, pengarap enggau penemu politik ti dipegai, enti bisi penusah ngenyit nuntung peranak menua tu endang nadai penanggul nyaup pangan diri.

“Nya kebuah kitai berasai lantang ati meda pemanah kaul enggau ulah ti gerah jari betulungka pangan diri ti tusah.

“Tambah mega nadai sebarang penusah enda manah baka bakal tauka bebadi nyawa maya penusah angus sekali tu nyadi, semina reta enggau dokumen beguna aja abis angus,” ku iya nampung.

Nangkan nya, Jugah bela meri bantu penusah ngenyit sepenyampau RM20,000 agi ngagai Komiti Pemansang enggau Pengelikun Genturung Pendiau (JKKK) rumah panjai nya.