RM11.8 juta udah diagih kena ngemujur projek jalai tebing pantai

ASAJAYA: Penyampau RM11.8 juta diagihka Perintah Sarawak nengah Opis Menteri Infrastruktur enggau Pemansang Penyangkai Kapal dikena ngemujurka projek ngemanah sereta ngaduka baru jalai tebing pantai ba Pakej A-1 (PA1).

Menteri Muda Infrastruktutr enggau Pemansang Penyangkai Kapal Datuk Julaihi Narawi madahka projek PA1 nya berengkah ari simpang Kampung Tambey udah Jematan Batang Samarahan ngagai menua Pelilih Asajaya.

“Ungkup pakej tu, kami udah beratika 331 KM penyauh jalai ti patut dikemanah sereta diaduka baru lalu sehari tu (27 Februari) kitai ba taba PA1 iya nya siti ari 23 pakej projek nya,” ku iya.

Julaihi madah munyi nya ba aum pemberita pengudah ngabas taba Projek Jalai Tebing Ai PA1 di Tebing Sungai Kampung Tambirat ditu, tadi.

Nangkan nya ku iya, endur projek nya nyadi jalai ke seruran dikena mensia mayuh di selampur Sarawak.

“Tu ukai semina dikena sida ke diau ba Bagi Menua Samarahan aja laban kitai ulih disambung penuh nengah servis feri ba pemanjai jalai tebing ai lalu frekuensi trafik mega deka betambah sereta mayuh pemar deka ditapi sida pengereja pengawa projek pemanjai pengawa ngemanah dipejalai.

“Tu nyengkaum gaya hari lalu aku ngarapka gaya hari mega seruran manah ngambika projek tu ulih tembu nitihka timpuh ke udah ditetapka dalam kunterik,” ku iya madah pasal projek ti disadang tembu kena 3 Ogos 2021.

Kelimpah ari nya, Julaihi mega madahka piak sida endang seruran nyukung ulah komuniti ba pengawa Industri Mit enggau Jelan Pemesai (IKS), taja pia ba pengawa ngemujurka pejalai projek PA1, piak sida udah minta kerejasama Majlis Perbandaran Kota Samarahan (MPKS) ngambi mindahka bala pedaja ba pemanjai endur projek nya ngagai endur ke likun alai bedaja.

Berebak enggau nya ba jaku iya, iya madahka projek dipejalaika sida nya ukai semina kelai bejadika taba projek (jaku aja) tang amat dipejalaika ba pemanjai 896 KM jalai tebing ai ari utara ke selatan Sarawak.

“Projek keterubah udah diberi iya nya Pakej PA-4 berengkah ari Jematan Batang Sadong ngagai Sungai Ladong, siti agi di Bakam Miri enggau projek ketiga baka ke dipeda kitai sehari tu.

“Dua agi projek deka berengkah ditender minggu baru semak enggau endur tu dikumbai Pakej PA-3 lalu siti agi PB-2 di Utara Sarawak,” ku iya.

Suara Sarawak