KUCHING: Agih belanja RM12 juta udah dikemendarka Perintah Sarawak ungkup ngaga projek palan latih Kem Pejilin Sarawak di Matang.Premier Sarawak Datuk Patinggi Tan Sri Abang Johari Tun Openg madahka kem pejilin nya manah dikemansangka laban ngembuan rampa menua ti manah baka gunung, kampung enggau ke bukai.
“Tu seriris enggau pelasar Sarawak nuju taun 2030 iya nya inklusif rama enggau tegap (meruan).
“Nyema kitai meri perati ngagai rampa menua pekara nya deka mantu nembiak rebak baru ke alai pekara nya nyadi sebagi ari tanggungpengawa raban pejilin,” ku iya.
Abang Johari bejaku munyi nya rambau Bejadika Program Rover Moot Sarawak Keterubah Renggat Nasional di Waterfront Kuching ditu, ensana.
Ku iya, Perintah Sarawak dibaruh embing iya deka seruran meri bantu ngagai raban nembiak pejilin enggau gerempung nembiak bukai.
“Nya alai aku numbuhka sebuah opis menteri baru (Opis Menteri Nembiak, Lumba Enggau Pemansang Dagang) dikena ngembing pelasar dunya enggau ekonomi baru ti bepanggai ngagai digital.
“Diatu semua orang nguna aplikasyen, engka kita ulih muka aplikasyen moden baka Aplikasyen Pejilin.
“Aku andalka Kem Pejilin ti deka digaga tu ila disikap enggau kereban digital awakka kita ulih bekaul enggau bakih kitai di Kalimantan, Semenanjung Malaysia, Sabah enggau di palan bukai nyengkaum di Amerika Syarikat.
“Ba pekara ekonomi baru, dunya berubah jampat nya alai raban pejilin patut udah besedia nyeridi enggau ngiga pekara baru.
“Sarawak diatu besedia ngaga kuasa ulih dikemaru dikumbai kuasa gadung, kitai ngaga hidrogen lalu kitai mesti madah ngagai raban orang tuai tu ukai bom hidrogen,” ku iya.
Iya nandu, raban pejilin patut mantu perintah ngerembaika penemu nya ngagai mensia mayuh dalam ubah menua bekaul kuasa hidrogen ti beresi.
