RM14.3 juta dikemendar ungkup bekal ai beresi di Ulu Roban

SARATOK: RM14.3 juta agih belanja udah dikemendarka Opis Menteri Pemansang Menua Pesisir (KPLB) ungkup Projek Nyambung Bekal Ai Beresi ngagai kandang menua Ulu Roban.

Sapit Menteri Pengeluar Kuasa enggau Pengeraja Asal, Datuk Ali Biju madahka agih belanja nya udah dikemendarka dalam bulan Januari taun tu tadi.

Ku iya, projek nya mungkur pengawa nyambung batang paip mayuh macham pemesai urung 14 kilometer (km) pemanjai, sebuah kulam (reservoir), sebuah stesyen ngepam ai (booster) enggau ke bukai.

“Nitihka penerang diterima aku, projek tu diatu udah ba renggat nyiri konsultan lalu dipelaba deka ditinda datai ba suku keterubah taun 2022 ila.

“Tu berita manah endar ngagai kita ke diau ba kandang menua Ulu Roban kelebih agi peranak enam buah rumah panjai ke apin nerima perengkaguna pemun tu,” ku iya ba sebengkah penerang kemari.

Ali ke mega Kaban Parlimen Saratok madahka diri deka seruran matau pejalai projek nya ti udah dipasuk ke dalam Atur Pemansang Malaysia Lumpar Ke-12 (RMK-12) ti dipelanja Perintah Besai nengah KPLB lalu Opis Bekal Ai Menua Pesisir (JBALB) udah dipadu nyadi ejensi bejalaika projek nya.

Ngena peluang nya, iya meri besai terima kasih ngagai Perintah Sarawak ti semampai nyukung enggau meri kerejasama semua projek pemansang infrastruktur di sitak Parlimen Saratok.

Suara Sarawak