KUCHING: Nengah MyCEB (Biro Aum Besai enggau Eksibisyen Malaysia) Malaysia udah mujur ngatur 15 aum besai ngaul pengari ari menua luar taja benung napi pengerekai penyakit Covid-19 berengkah ari taun 2022 nyentuk 2030 ti deka datai.

Menteri Dagang Temuai, Seni enggau Main Asal (Motac) Datuk Seri Nancy Shukri madahka sida melaba urung 16,000 iku pengari entarabansa deka datai enggau perambu pangka ekonomi manggai RM140 juta.

“Sarawak entara nengeri ti nyelai lebuh ngatur Pengawa Dagang (Program Dagang) laban Sarawak entara nengeri keterubah ti numbuhka biro aum besai ba taun 2006.

“Aku berasai temegah laban Perintah Sarawak nyanggup diri nyadi palan penatai ungkup pengawa dagang besai,” ku iya.

Nancy bejaku munyi nya ba Program Meet in Malaysia @ Sarawak 2021 enggau Program Ngelancharka Kuching Nyadi Kaban Gempung Mengeri Hibrid di sebuah hotel ditu, kemari.

Ku iya, ba pelasar entarabansa, Sarawak dipeda nyadi palan beguna endur ngatur mayuh aum besai ari serata dunya.

“Sarawak meri alternatif ngagai temuai baikka bekunsi daya idup baka pengidup di rumah panjai, ngusung gua baka Pesaka Dunya Unesco Taman Negara Gunung Mulu enggau ke bukai ti nyadi pekara berega ngagai temuai lebuh sida pulai.

“Ba sektor dagang, Sarawak ngembuan pengelebih baka buah penemu ti inovatif, kreatif, industri baru enggau sukung strategik ti ngasuh Sarawak nyadi palan digiga bala pengatur,” ku iya.

Nancy madahka ba renggat nasional MyCEB udah ngenegapka menua mansang sereta nyadi menua bepenatai pemisi tinggi kelebih agi ari sukut ekonomi baka muka pengawa puang enggau ke bukai.

“MyCEB tu sebuah ejensi dibaru Motac ti ngembuan pengawa ngatur aum besai enggau program besai sereta mai pangka ngagai ekonomi menua, pemansang penau komuniti enggau pesaka asal ti tegap,” ku iya.