RM145 juta diagih kena mutar penanggul isu bekal ai di Sri Aman

KUCHING: Perintah Sarawak ngagihka belanja RM145 juta ungkup projek nyambung ai paip ari Batang Lupar enggau Batang Ai ngagai Sungai Undop dikena mutarka penanggul peranak Sri Aman ti suah suntuk bekal ai.

Menteri Utiliti, Datuk Seri Dr Stephen Rundi Utom madahka projek nya deka dipejalai enda lama agi laban diatu udah ditinder enggau udah dikemendar.

“Sungai Undop kelalu mit enggau pabu dikena nangkup peminta bekal ai ba Tangki Ai Beresi Bayai.

“Nya alai, pengawa nyambung ai nya beguna amat laban bekal ai ari Tangki Ai Beresi Engkilili enda chukup nangkup peminta peranak dia,” ku Rundi.

Rundi mansutka jaku nya ba aum pemberita pengudah ngatur pejalai ngabas seraya gawa ba Kaunsil Ai Kuching, ditu kemari.
Ku iya, nya kebuah perambu opis menteri iya mutarka penanggul bekal ai ba Sri Aman kelebih agi maya musin kemarau baka ke kala nyadi ba taun 2019.

Taun nyin kemari, Sri Aman napi penanggul suntuk bekal ai ketegal bekal ai kurang ba Tangki Ai Beresi Bayai, Tangki Ai Beresi Pantu, Tangki Ai Beresi Seduku, Tangki Ai Beresi Stumbin enggau Tangki Ai Beresi Lingga.

“Nya entara perambu kitai nyengkaum kandang menua Kabong, Saratok enggau ke bukai dataika Grid Bekal Ai Sarawak disambung penuh,” terang Rundi.

Nitihka ripot ke dulu, projek nya disadang tembu dalam timpuh tiga taun mungkur nambahka pemayuh ai, nambahka pemesai tangki ai enggau nukar paip ke udah lama.

Datuk Seri Dr Stephen Rundi Utom