RM150 juta dikemendar kena ngaga jalai ke Gedung – Ulu Simunjan

SIMUNJAN: Kepala Menteri Datuk Patinggi Abang Johari Tun Abang Openg udah ngemendarka agih belanja RM150 juta dikena ngaga jalai baru besambungka menua Gedong ke Jalai Raya Pan Boneo di sitak Balai Ringin nengah Ulu Simunjan.

Menteri Muda Dagang Entarabansa enggau Industri, Terminal Industri enggau Pemansang Dagang, Datuk Mohd Naroden Majais madah, jalai baru nya mansa Kampung Batu Pengansah, Kepayang enggau Kedumpai kelimpah rembus ba Bukit Punda, Balai Ringin.

Ku iya, enti udah tembu jemah peanak ba Ulu Simunjan muntang amat nurun ke Gedong, Serian, Kuching enggau Samarahan.

“Jalai baru tu ngemuntangka pejalai peranak ari Ulu Simunjan ti deka nurun ke Serian, Kuching enggau Kota Samarahan nengah Gedong.

“Enti diatu sida ari Ulu Simunjan jauh amat melit ngambi awak 45 minit enti nurun ke Gedong nyema nengah Pasar Simunjan.

“Terima kasih ngagai perintah nengeri lebih agi Kepala Menteri Datuk Patinggi Abang Johari Tun Openg laban udah ngemendarka agih belanja RM150 juta unngkup ngaga jalai tu,” ku iya.

Naroden ke mega Adun Gedong madah munyi nya ba Pengerami Hari Krismas enggau Taun Baru 2021 di Kampung Tinting Tuba kena Hari Lima tu tadi.

Bela bisi datai Pegawai Pelilih Simunjan, Abdul Khalid Manap, ex-Temenggong, Anthony Nyipak enggau Penghulu Mohd Najib Arbi ke mega chairman komiti pengerami nya.

Berebak enggau nya, Naroden ngarapka taun 2021 mai tuah ke belimpah ngagai peranak Gedong nyengkaum ba Ulu Simunjan enggau Pangkor.

Ku iya, taun tu semua rayat ba serata dunya napi penguji besai ketegal pengerekai pandemik Covid-19.

Ketegal penyakit nya, mayuh rayat putus pengawa kelimpah mayuh palan endur gawa ditutup.

Nya alai, iya ngarapka mensia mayuh terus ngasika SOP ke udah ditetapka perintah dikena nagang pengerekai penyakit tu.

Ba pengerami nya, Naroden bisi nyuaka replika chek penyampau RM300,000 nengah RTP DUN Gedong enggau RM200,000 ari Unifor ngagai Gerija St Mark Chapel Gayau.

Udah nya bela nerima agih RTP Dun Gedong RM300,000 iya nya Gerija Seventh-Day Adventis (SDA) ditangkan Unifor meri RM100,000 ungkup Gerija SDA Kepayang.