RM1,500 nganti Dayung Gawea Tematu 2019

KUCHING: Mensia mayuh ditesau sampal datai ngerichahka agi Pengerami Gawai Kampung Tematu 2019.

Ku Pengatur pengerami John Pata, mayuh macham atur pengerami udah dirintai nyerumba pengerami nya nyengkaum pekit Dayung Gawea Tematu.

“Pekit deka diatur malam hari enam tu lalu sepuluh iku pemekit deka berebutka gelar Dayung Gawea Tematu.

“Champion deka pulai ngemai perais mata duit RM1,500, jumpang, bungai, trofi, hamper sereta setipikit,” ku iya madah ba sebengkah penerang berita.

Nangkan nya ku John, pemenang lumbur dua deka nerima perais mata duit RM1,400, jumpang, bungai, selampai, trofi, hamper enggau setipikit lalu pemenang ketiga nerima RM1,100, jumpang, bungai, selampai, trofi, hamper enggau setipikit.

SAPA NGEMPU GELAR… Sepuluh iku pemekit berebut gelar Dayung Gawea Tematu 2019.

Bala pemekit ti deka berebutka gelar Dayung Gawea Tematu iya nya Nancy Elfira Stephen, 21, ari Kampung Tematu, Agnes Anastasha Amat, 24, ari Kampung Jagoi Bogag, Kimberly Alta Thomas, 27, ari Kampung Emperoh Jambu enggau Sue Zane Melanie, 22, ari Kampung Segubang.

Nyengkaum Jaydylia Anna Charles, 19, ari Kampung Tijirak, Melvien kina Vianney Regud, 18, ari Kampung Bawang, Jacline Sahfica Brucly, 18, from Kampung Tematu, Irine Yap Hui Xin, 19, ari Kampung Bumbok, Michelle Anak Perai, 18, ari Kampung Benuk sereta Eve Ronald Bujeng, 19, ari Kampung Benuk mega ngujika nasip diri.

Pekit mega bisi nyendiaka tujuh perais sagu ati penyampau RM100 siku disempulang hamper enggau setipikit.

“Bala pemekit mega berebutka gelar Miss Talent, Miss Tourism, Miss Popular, Miss Photogenic, Miss Best Costume enggau Miss Traditional,” ku iya nerang silik.

Pia mega, genap pemenang gelar nya deka nerima perais mata duit RM200, trofi enggau selampai.

Menteri Muda Nembiak enggau Lumba, Datuk Snowdan Lawan disadang deka nyadi temuai dipebasa sereta bejadika pengerami nya ila.

Nangkan nya, empat bengkah raban main asal deka bepekit ba pekit muzik enggau ngajat asal ti deka diatur lemai 21 Jun.

Entara raban tu iya nya, Bijagoi Heritage Group ari Kampung Jagoi Duyoh, Oyak Ba’ai ari Kampung Atas Singai, Staak B’somu ari Kampung Atas Singai sereta Timogah Borneo ari Kampung Tetamu.

“Berebak enggau nya, sepenyampau 13 iku anak mit deka bepekit ba pekit Onal Dayung iya nya sebagi ari pekit pemajik gamal kategori anak mit ti deka dipenyadika Pemangku Sekretari Perintah Sarawak Datuk Ik Pahon Joyik.

“Perais mega deka diberi ngagai dua temuai ti betuah, lelaki enggau indu, ti ngerasuk ngepan asal pemadu manah (Bidayuh, Iban enggau Orang Ulu) malam 22 Jun,” ku iya.

Iya mega madah masuk ngagai pengerami nya ila nadai bebayar lalu bisi tikit betuah dijual rambau pengerami nya.