KUCHING: Agih belanja RM16 juta disedia Perintah Sarawak ngagai genap Palan Pelajar Tumu Anak Mit (IPAKK) ba menua tu.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madah tu diberi nengah Geran Khas Ninting Taun (GTK) ti beungkus RM 5,000 ngagai tiap IPAKK.

“Tuju kebendar GTK IPAKK meri fokus ngagai chara makai ti bepengerai, pelajar ti ngerinduka ati, chara ngajar nengah digital ngagai anak mit, kaul apai indai sereta kompetensi orang ke nyaga enggau pengajar.

“Empat bengkah pekara tu entara fokus ti pemadu beguna dalam chara ngajar anak mit ba renggat pemadu tumu lalu tu mantu nambahka kualiti kereja ba IPAKK,” ku iya madah ngagai pengarang berita, kemari.

Fatimah madah nengah GTK, tiap IPAKK ti udah ngeregista diri patut mantaika penerang diri ngagai opis menteri iya baka ke udah dipadah dalam penerang.

DATUK SERI FATIMAH ABDULLAH

“Taska tauka tadika ba menua pesisir tau nganjung penerang sida nengah pos tauka email.

“Kitai enda tau madah penanggul penyauh menua nya nyadi kebuah sida enda tau sama ampit nerima bantu tu,” ku Fatimah.

Kelimpah ari nya, Fatimah ngasuh opis menteri iya ngaga pansik sereta berandau pasal perambu KEMAS ngambika anak mit ba Sarawak enda tinggal bulih pelajar tumu enda ngira ba menggeri tauka menua pesisir.

“Aku ngarapka nengah insentif tu ulih meri guna ngagai tiap IPAKK awakka lebih efisyen lebuh ngereja pengawa.
“Tu ulih nambahka kualiti pelajar tumu anak mit ngambika ulih nempa raban ti pintar jemah ila,” ku iya nambah.

Fatimah mega mantaika pengaga ati laban 94 peratus anak mit ba menua tu nerima pelajar tumu ba taska tauka tadika.

Seraya, Fatimah madah sida deka bejalaika pengawa ngaga Palan Nyaga Anak Mit ba selampur Sarawak ti udah dipejalaika ba Sarawak Energy Berhad (SEB).

Tu dipejalaika ngambi bala apai indai ke gawa nyamai nganjung anak sida ngagai palan ti likun, ku Fatimah.

Suara Sarawak