RM2.37 bilion agih ungkup bekal kuasa karan

MIRI: Penyampau RM2.37 billion agih udah dikemendarka Perintah Sarawak ungkup Pelin Pugu Kuasa Karan Menua Pesisir ba taun 2019 dalam ngemesaika bungkur bekal kuasa karan ngagai ruang bilik.

Menteri Utiliti Datuk Seri Dr Stephen Rundi Utom madahka, agih khas nya deka ngemesaika bungkur bekal kuasa karan 24 jam ba menua pesisir ari 93 peratus ngagai 96 peratus.

Ku iya, penyampau 22,360 ruang bilik tauka tujuh peratus peranak menua pesisir agi bedau nerima bekal kuasa karan 24 jam.

Ungkup nya, iya madahka, strategi nyendiaka kuasa karan menua pesisir endang nengah sambung BELB grid agih enggau sambung RPSS grid nganjung ngagai pelilih menua ti bisi jalai alun.

“Kelimpah ari nya, sistem tunggal ngena sumber kuasa karan alternatif baka HYBRID enggau SARES ungkup pelilih menua ti jauh.

“Tu seriris enggau Program Transformasyen Menua Pesisir Sarawak ti deka ngedut takah pemansang diasai peranak menua pesisir enggau mengeri ngambika sama ampit nerima perengkaguna utiliti pemun,” ku iya bejaku ba Program Sares di Long Pilah, Ulu Baram, ensana.

Ku Rundi, penyampau RM600 juta agih dalam pelin nya udah diagih ungkup bekal kuasa karan nuju 400 buah kampung ti ngaul 12,000 ruang bilik nengah program Sares.

Tandu iya, kenyau Sares udah dipejalai lebih 7,988 ruang bilik di 277 buah kampung enggau rumah panjai udah nerima kuasa karan 24 jam.

Iya madahka, 71 peratus pejalai Sares tu nyengkaum pelilih menua Telang Usan ti ngaul 51 buah rumah panjai ke ngembuan 2,504 ruang bilik.

Ku Rundi, perambu ungkup Pelilih Telang Usan ba baruh Sares ungkup taun 2021 nangkan tu ila deka ngaul lima agi rumah panjai ti ngembuan 95 pintu ruang bilik iya nya Long Seniai (30 pintu), Long Melangit (12 pintu), Long Kaho (20 pintu), Long Sengayan (20 pintu) enggau Long Pelanduk (13 pintu).

“Semua lima buah rumah panjai tu deka bulih bekal kuasa karan enda lama agi,” ku iya.

Berebak enggau nya, dalam Langgur Pemansang Malaysia Lumpar Ke-12 (RMK-12), Rundi madahka opis menteri iya deka meri fokus mayuh agi ngagai pengawa ngaga palan grid nganjung ti lebih strategik nyambung Sares.

Terang iya, lebuh infrastruktur nganjung kuasa karan udah digaga nyengkaum jalai alun, opis menteri deka bejalaika pengawa nyambung komuniti Sares ngagai grid besai chara berenggat.

Suara Sarawak