KUCHING: Opis Menteri Pengawa Bekebun enggau Komoditi nengah Kaunsil Getah Malaysia (MRC) deka ngelanchar Belanja Komersial MRC (MCF) bulan Oktober tu dikena nyukung aktiviti komersil ari raban indu getah.
Menteri Pengawa Bekebun enggau Komoditi, Datuk Seri Fadillah Yusof madah, sepenyampau RM20 juta disedia di baruh belanja nya dikena nyukung komersial produk Pansik enggau Pemansang (R&D) bekaul getah ngambi rembus makit serantau enggau antarabansa,” ku iya.
Fadillah mansutka jaku nya lebuh nyimpul jurai opis menteri ba Dewan Rakyat, ditu kemari.
Nambahka nya, ku iya, MRC udah numbuhka unit khas mantu nambah aktiviti komersial R&D enggau mindahka teknologi dalam industri getah.
Ngelansa pasal rega getah ti nurun, Fadillah ke mega Sapit Menteri Besai madah, rega getah nya dikeruga bemacham pekara kelebih agi peminta getah dunya.
Ku iya, intervensyen ari perintah nya enda mudah enggau ba tikas minimum laban industri getah menua nya bepelasar eksport enggau pemansut menua mega semina urung 3.3 peratus.
“Sama mega enggau rega getah ba Semenanjung, Sabah enggau Sarawak nya nitih peminta makit kelimpah ari ungkus perengka pengangkut ngujungka brega bebida ba renggat ladang,” terang iya.
Nya kebuah ku Fadillah, entara inisiatif ke benung dipejalai dikena mantu pekebun mit ti napi penusah ketegal rega getah nurun enggau enda tegap ba makit kelimpah inisiatif nambah penatai pemisi pekebun mit getah nya nengah Insentif Pemansut Getah (IPG).
Ku iya, kenyau ari 1 Januari 2023, perintah udah niki ke Tikas Rega Aktif (PHP) ungkup IPG ari RM2.50 ke RM2.70 sekilo peleku getah.
“Naka Ogos 2023, pengawa meri IPG udah meri pemaik ngagai 217,705 pekebun mit enggau bayar penyampau RM474.54 juta,” ku iya seraya madahka Program IPG udah dipejalai berengkah September 2015.
Tambah mega ku iya, perintah nengah Kaunsil Getah Malaysia (LGM) udah bejalaika Projek Transformasyen Dagang Getah Menua (TARGET) enggau projek nya disadang ulih nambahka rega getah sereta meri penatai pemisi ke manah agi ngagai pekebun mit getah.
Fadillah madah baru, Program Insentif Pemansut Pelai Getah (IPL) mega dipejalai dikena nambahka penatai pemisi pekebun mit getah sereta meransang sida mansutka pelai gerah ngambi nangkup bekal pelai gerah menua ungkup sektor ili.
“Dikena meransang pekara nya, genap pekebun mit getah ti masuk program tu deka nerima insentif RM 1.00/kg ungkup 100 peratus getah rangkai (KGK).
“Bala penyereta mega nerima bantu kereban betanam baka sum enggau rachun penyampau RM850 ungkup genap hektar chara sekali beri,” terang iya silik.
