PAKAN: Sepenyampau RM20 juta udah dikena ngemansangka sitak Parlimen Julau ba penggal keterubah nyadi Kaban Parlimen dia, ku Datuk Larry Soon @ Larry Sng Wei Shien.
Ari penyampau nya, RM9,505,000 nengah geran Projek Mit Pemansang Menua Pesisir (MRP) udah diungkupka ngagai 680 buah Komiti Pemansang enggau Pengelikun Genturung Pendiau (JKKK) ba sitak Julau.
Bela nerima ari agih belanja nya 34 buah sekula enggau 50 buah gerempung ukai dikuasa perintah (NGO), kelab enggau rumah sembiang.
Ba baruh Projek Mesra Rayat (PMR) ti udah nguna belanja penyampau RM3,750,000 udah dikena ngaga projek fizikal nyengkaum projek nyeleti jalai alun, jematan enggau rumah panjai.
Sepenyampau RM2,000,000 nengah Projek Khas Opis Menteri Besai udah dibelanjaka dikena ngaga Jalai Lubuk Besai-Melepong, Jalai Ijit-Kakop, Jalai Rumah Awar-Rumah Umpang, Jalai Rumah Suing Enteberu enggau Jalai Rumah Tadong di Gerugu Sengaih.
Ku Larry ti nyadi penyandang sitak Julau, RM2,700,000 ba baruh Projek Opis Menteri Pemansang Menua Pesisir (KPLB) udah diungkupka ngaga Projek Jematan Rantau Bandau, Julau Waterfront enggau entepan kerita di Pelilih Pakan.
Larry mega madah, RM1,870,000 udah dikena bejalaika tangungpengawa pengasih baka meri bantu ngintu pengelantang rayat, penusah rabat, penusah aksiden enggau sakit raya, mantu orang nyelai pendiau (OKU), orang tuai umur enggau mantu rayat seranta ba sitak nya.
Ungkup bantu penusah ngenyit enggu penyakit, Larry udah nguna agih belanja RM225,000 ti diberi ngagai rayat ditinggang penusah angus, tanah tusur, bejalaika bantu rambau pandemik Covid-19 sereta mantu 100 buah rumah panjai, sekula enggau raban rela.
Nengah Wang Turu Pejar Tinggi Larry Sng, 540 iku nembiak besekula udah dibantu ti nguna agih belanja sepenyampau RM275,200.
