KUCHING: Kaunsil Pemansang Kayu Ramu Sarawak (Pusaka) udah nyuaka pemeri bantu ngagai 62 buah gerempung enggau palan pengelantang pendiau sepenyampau RM286,000.

Sapit Premier Sarawak ti mega Chairman Kaunsil Pengatur Pusaka Datuk Amar Awang Tengah Ali Hasan madahka bantu tanggungpengawa rama koporat (CSR) nya endang aktiviti ninting taun Pusaka kenyau taun 1982.

“Bantu tu dikena nyukung gerempung enggau palan pengelantang pendiau ngatur aktiviti sida kelimpah mantu raban ti kurang benasip.

“Nya seriris enggau pengawa perintah menua ti deka mansutka komuniti ti meruan dalam nyeridi organisasyen korporat bejalaika CSR ngagai rayat,” ku iya.

Awang Tengah bejaku munyi nya rambau Program Meri Bantu Pusaka di Balai Licha Pusaka, Wisma Sumber Alam ditu, kemari.

Ku iya, CSR nya mega dikeandal ulih ngelempungka tating gerempung ketegal Covid-19 ti udah meri pangka ngagai pengerai mensia mayuh, pengelikun, enggau ekonomi.

“Mayuh industri ditutup enggau mayuh mega raban orang dagang agi jengap-jengap beretan nyengkaum anak serikat Pusaka empu.

“Taja pia, kitai benasip taja pan napi pemar enggai penanggul, Perintah Sarawak enggau Perintah Besai agi ulih meri bantu ngagai rayat ti tesepit,” ku iya.

Iya ti mega Menteri Pemansang Mengeri Enggau Pengeraja Asal Kedua nangkan nya andalka semua pengawa ekonomi menua tu suman baru.

“Diatu kitai udah tama dalam renggat endemik ti meri pemaik ngagai raban industri enggau orang dagang nambahka penatai pemisi sida.

“Nya alai, dalam renggat tu aku ngelalau mensia mayuh seruran bejimat enggau nyaga pengerai kelebih agi rambau Hari Raya ti deka datai.

“Lebuh udah bisi Atur Pengawa Standard (SOP) Hari Raya, aku ngarapka semua kitai nitihka SOP nya laban kitai enggai agi ngasaika Atur Mindah Betagang (PKP),” ku iya.

Sama bisi datai Sapit Menteri Pemansang Mengeri Enggau Pengeraja Asal Datuk Len Talif Salleh enggau Menijar Besai Pusaka Datuk Hashim Bojet.